തൃക്കരിപ്പൂര്‍: ജില്ലാ ഫുട്‌ബോള്‍ അസോസിയേഷന്‍ തൃക്കരിപ്പൂര്‍ സിന്തറ്റിക്ക് സ്റ്റേഡിയത്തില്‍ സംഘടിപ്പിക്കുന്ന സംസ്ഥാന ഇന്റര്‍ ക്ലബ് ഫുട്‌ബോള്‍ ചാംപ്യന്‍ഷിപ്പില്‍ സ്‌പോര്‍ട്‌സ് അക്കാദമി പാലക്കടിനെ എതിരില്ലാത്ത 11 ഗോളുകള്‍ക്ക് പരാജയപ്പെടുത്തി കൊച്ചിന്‍ പോര്‍ട്ട് ട്രസ്റ്റ് ക്വാര്‍ട്ടര്‍ ഫൈനലില്‍ കടന്നു. ഇന്നലെ നടന്ന വിരസമായ മത്സരത്തില്‍ കളിയുടെ എല്ലാ മേഖലകളിലും പോര്‍ട്ട് ട്രസ്റ്റ് ആധിപത്യം ഉറപ്പിച്ചു. പോര്‍ട്ട് ട്രസ്റ്റ് ഒന്നാം പകുതിയില്‍ ആറുഗോളുകളാണു നേടിയത്. പോര്‍ട്ട് ട്രസ്റ്റിന്റെ വിദേശ താരം നാലുഗോളുകള്‍ പാലക്കാടിന്റെ വലയിലാക്കി. രണ്ടാം പകുതിയില്‍ അഞ്ചു ഗോളുകളും നേടി. രണ്ടു വിദേശ താരങ്ങളുമായാണ് പോര്‍ട്ട് ട്രസ്റ്റ് കളിക്കാനിറങ്ങിയത്.
ഇന്ന് അവസാന ക്വാര്‍ട്ടര്‍ ഫൈനലില്‍ കൊച്ചിന്‍ പോര്‍ട്ട് ട്രസ്റ്റ് ശക്തരായ എസ്.ബി.ഐ കേരളയെ നേരിടും. നാളെ നടക്കുന്ന ആദ്യ സെമിയില്‍ കരുത്തരായ ഗോകുലം എഫ്.സി മലപ്പുറം, സെന്‍ട്രല്‍ എക്‌സൈസ് എറണാകുളത്തെ നേരിടും. ഇന്നു നടക്കുന്ന മത്സരത്തില്‍ വിജയിക്കുന്ന ടീം ഞായറാഴ്ച കേരളാ പൊലിസിനെ നേരിടും. പത്തിനാണു ഫൈനല്‍.