മലപ്പുറം: കേരളത്തിലുടനീളം പ്രവര്‍ത്തിക്കുന്ന വ്യാജ ദന്തല്‍ ക്ലിനിക്കുകള്‍, ഡെന്റല്‍ ലാബുകള്‍ എന്നിവക്ക് പൂട്ടുവീഴും. സ്വകാര്യമേഖലയില്‍ പ്രവര്‍ത്തിക്കുന്ന ഇത്തരം സ്ഥാപനങ്ങള്‍ക്ക് ഏകീകൃത രജിസ്‌ട്രേഷന്‍ നിര്‍ബന്ധമാക്കിയതോടെയാണ് വ്യാജന്മാര്‍ പടിക്കുപുറത്താകുന്നത്്.
നിയമാനുസൃതമല്ലാതെ പ്രവര്‍ത്തിക്കുന്ന സ്വകാര്യ ദന്തല്‍ സ്ഥാപനങ്ങള്‍ക്കെതിരേ വ്യാപകായ പരാതി ഉയര്‍ന്നിരുന്നു. ഇതിന്റെ പശ്ചാതലത്തില്‍ ദന്തല്‍ കൗണ്‍സിലില്‍ രജിസ്റ്റര്‍ ചെയ്ത ക്ലിനിക്കുകള്‍ മാത്രമേ പ്രവര്‍ത്തിക്കാവൂ എന്ന തരത്തില്‍ കഴിഞ്ഞ ജനുവരിയിലാണ് ആരോഗ്യവകുപ്പ് തീരുമാനമെടുത്തത്്.
പലയിടത്തും സാധാരണ വ്യാപാര സ്ഥാപനങ്ങള്‍ ആരംഭിക്കുന്നതിനുള്ള നപടിക്രമങ്ങള്‍ മത്രാമാണ് ദന്തല്‍ സ്ഥാപനങ്ങളും സ്വീകരിക്കുന്നത്്. വേണ്ടത്ര യോഗ്യതയില്ലാത്തവരും മറ്റു രാജ്യങ്ങളില്‍നിന്ന് ദന്തല്‍ ബിരുദം കരസ്ഥമാക്കി രാജ്യത്തെ നടപടിക്രമങ്ങള്‍ പൂര്‍ത്തിയാക്കാത്തവരും കേരളത്തിലുടനീളം ദന്തല്‍ ക്ലിനിക്കുകളും ദന്ത ലാബുകളും നടത്തിവരുന്നുണ്ട്്. പൊതുജനാരോഗ്യവുമായി ബന്ധപ്പെട്ട ചികിത്സക്ക് കൃത്യമായ അടിസ്ഥാന സൗകര്യം ഒരുക്കേണ്ടതുണ്ട്്. രോഗികളുടെ സുരക്ഷ ഉറപ്പാക്കുന്നതിനുള്ള വിദഗ്ധരോ സാങ്കേതിക ഉപകരണങ്ങളോ മിക്ക സ്ഥാപനങ്ങളിലും ഇല്ലെന്നതും സര്‍ക്കാര്‍ കണ്ടെത്തിയിരുന്നു.
നാമമാത്രമായി യോഗ്യതയുള്ളവരെ നിയമിച്ച് ബാക്കിയെല്ലാം മേഖലയില്‍ ഔപചാരിക വിദ്യാഭ്യാസമില്ലാത്തവരെ നിയമിക്കുന്ന രീതിയുമുണ്ട്്. പൊതുജനാരോഗ്യവുമായി ബന്ധപ്പെട്ട വിഷയമായതിനാല്‍ മറ്റ് അധികാര സ്ഥാപനങ്ങളുടെ അനുമതിക്കൊപ്പം കേരള ഡെന്റല്‍ കൗണ്‍സിലിന്റെ അനുമതി കൂടി നിര്‍ബന്ധമാക്കാനായിരുന്നു സര്‍ക്കാര്‍ ഉത്തരവിട്ടത്്.
ഇതിന്റെ ഭാഗമായി അനുമതിക്കായി സമര്‍പ്പിക്കേണ്ട അപേക്ഷയുടെ മാതൃക തയാറാക്കുന്നതിന് കേരള ഡെന്റല്‍ കൗണ്‍സില്‍ രജിസ്ട്രാറെ സര്‍ക്കാര്‍ ചുമതലപ്പെടുത്തിയിരുന്നു. അപേക്ഷകന്റെ പൂര്‍ണ വിവരങ്ങള്‍ രേഖപ്പെടുത്തേണ്ട അപേക്ഷ മാതൃകയക്ക് കഴിഞ്ഞദിവസം സര്‍ക്കാര്‍ അനുമതി നല്‍കി. സ്ഥാപനത്തിന്റെ പേര്്, സ്ഥാപനം നടത്തുന്നയാളുടെ പേര്, മെഡിക്കല്‍ വിദ്യാഭ്യാസ യോഗ്യത,രജി.നമ്പര്‍ തുടങ്ങിയ കാര്യങ്ങള്‍ കൃത്യമായി രേഖപ്പെടുത്തിവേണം ഇനി അപേക്ഷ നല്‍കാന്‍.
1948ലെ ദന്തല്‍ കൗണ്‍സില്‍ ആക്ട് പ്രകാരമുള്ള മാനദണ്ഡങ്ങള്‍ പാലിക്കുന്ന സ്ഥാപനങ്ങള്‍ക്കുമാത്രമേ ഇനി മുതല്‍ പ്രവര്‍ത്തനാനുമതി ലഭിക്കുകയുള്ളു. ദന്തല്‍ കൗണ്‍സില്‍ പ്രതിനിധികള്‍ നേരിട്ടു പരിശോധന നടത്തിയാവും ദന്തല്‍ ക്ലിനിക്കുകള്‍, ഡെന്റല്‍ ലാബുകള്‍ എന്നിവക്കുള്ള അനുമതി നല്‍കുക. ആയിരക്കണക്കിന് വിദ്യാര്‍ഥികളാണ് ഒരോ വര്‍ഷവും ദന്ത പരിചരണവുമായി ബന്ധപ്പെട്ട മെഡിക്കല്‍ വിദ്യാഭ്യാസം പൂര്‍ത്തിയാക്കി പുറത്തിറങ്ങുന്നത്്.
സംസ്ഥാനത്തിനു പുറത്തും വിദേശത്തും പഠിക്കുന്നവര്‍ വേറെയുമുണ്ട്്. ജനങ്ങളുടെ ആരോഗ്യ സംരക്ഷണത്തോടൊപ്പം ഈ മേഖലയിലെ തൊഴില്‍ പ്രതിസന്ധി പരിഹരിക്കാനും സര്‍ക്കാര്‍ തീരുമാനം ഗുണം ചെയ്യും.