സ്വന്തംലേഖകന്‍

തിരുവനന്തപുരം: സംസ്ഥാനത്ത് ട്രോളിങ് നിരോധനം നിലവില്‍ വന്ന് ഒരാഴ്ച്ച പിന്നിടുമ്പോഴേക്കും ഇതര സംസ്ഥാനങ്ങളില്‍ നിന്ന് രാസവസ്തു കലര്‍ന്ന മത്സ്യം തലസ്ഥാന ജില്ലയിലെ മാര്‍ക്കറ്റുകളിലേക്ക് എത്തിത്തുടങ്ങി. ഈ മാസം എട്ടിനാണ് സംസ്ഥാനത്ത്് ട്രോളിങ് നിരോധനം നിലവില്‍ വന്നത്.
ഇതിനു പിന്നാലെ തമിഴ്‌നാട്, കര്‍ണാടക സംസ്ഥാനങ്ങളില്‍ നിന്ന്് വന്‍തോതില്‍ മായം കലര്‍ന്ന മത്സ്യം അതിര്‍ത്തി കടന്നെത്തുകയാണ്. പൂവാര്‍, അമരവിള, ചെക്കുപോസ്റ്റുകള്‍ വഴിയെത്തുന്ന മത്സ്യങ്ങളില്‍ പരിശോധന പ്രഹസനം മാത്രമാണെന്ന് ആക്ഷേപം ശക്തമാണ്. ദിവസം അമ്പതിലധികം ലോഡ് മത്സ്യമാണ് വരുന്നത്.
തമിഴ്‌നാട്ടിലെ തൂത്തുക്കുടി, കന്യാകുമാരി, കുളച്ചല്‍, മുട്ടം തുടങ്ങിയ ഹാര്‍ബറുകളെയാണ് ഇപ്പോള്‍ മത്സ്യങ്ങള്‍ക്കായി ആശ്രയിക്കുന്നത്.
ദിവസങ്ങളോളം കടലില്‍ കിടക്കുന്നതിനാല്‍ ബോട്ടുകാര്‍ പിടികൂടുന്ന മത്സ്യങ്ങളില്‍ കടലില്‍ വച്ചുതന്നെ അമോണിയ ചേര്‍ത്ത ഐസ് ഇടാറാണ് പതിവ്. ചീയാതിരിക്കാന്‍ സോഡിയം ബെന്‍സോയിറ്റ് എന്ന രാസവസ്തുവും കടല്‍ മണലും കൂട്ടിക്കുഴച്ച് വീണ്ടും മത്സ്യങ്ങളുടെ പുറത്ത് വിതറുന്നതോടെ ഇവ കൂടുതല്‍ വിഷമയമായി മാറുന്ന അവസ്ഥയാണ്.
ശരീരങ്ങള്‍ കേടുകൂടാതിരിക്കാന്‍ ഉപയോഗിക്കുന്ന ഫോര്‍മലിന്‍ വിഷവസ്തുവാണ്. ചെറിയ അളവില്‍ പോലും ഗുരുതരമായ ആരോഗ്യ പ്രശ്‌നങ്ങളുണ്ടാക്കും. ഫോര്‍മലിനും അമോണിയയും കരള്‍, വൃക്ക എന്നിവയെയാണ് ബാധിക്കുക. സോഡിയം ബെന്‍സോയറ്റ് പോലുള്ളവ വലിയ അളവില്‍ ഉപയോഗിക്കുന്നത് ഗുരുതര ആരോഗ്യപ്രശ്‌നങ്ങളുണ്ടാക്കും.
കഴിഞ്ഞ ദിവസം നഗരത്തിലെ പ്രധാന മത്സ്യ ഹോള്‍സെയില്‍ മാര്‍ക്കറ്റുകളില്‍ എത്തിയ ലോഡ് കണക്കിന് ചൂരയും നെയ്മീനും ദിവസങ്ങള്‍ പഴക്കമുള്ളതും രാസവസ്തുക്കള്‍ ചേര്‍ത്തിരുന്നവയുമായിരുന്നു.
ഓണ്‍ലൈന്‍ വിപണനരംഗം വഴി വിതരണം ചെയ്യുന്നതില്‍ അധികവും ഇത്തരം മത്സ്യങ്ങളാണന്ന് മൊത്തവിതരണക്കാര്‍ പറയുന്നു. മത്സ്യങ്ങളിലെ വിഷാംശം കണ്ടെത്തുന്നതിനായി ഫിഷറീസ് വകുപ്പ് നടപ്പാക്കുന്ന സിഫ്‌ടെസ്റ്റും ഫലം കാണാത്ത സ്ഥിതിയാണ്.