വാഷിങ്ടണ്‍: കൊവിഡ് പ്രതിരോധ നടപടികളുടെ ഭാഗമായി പ്രഖ്യാപിച്ചിരുന്ന നിയന്ത്രണങ്ങളില്‍ ഇളവുവരുത്തുന്ന കാര്യം പുറത്തുവിടുമ്പോഴും ഇറ്റലിയില്‍ മരണസംഖ്യ ഉയരുന്നു.

 27,359 പേരാണ് രാജ്യത്ത് കൊവിഡ് ബാധിച്ച് മരിച്ചത്. രോഗം ബാധിച്ച് 59,438 പേര്‍ മരിച്ച അമേരിക്കയ്ക്കു പിന്നില്‍ രണ്ടാമതാണ് ഇറ്റലി. സ്‌പെയിനില്‍ മരണസംഖ്യ 24,275 ആയപ്പോള്‍, ഫ്രാന്‍സില്‍ 23,660ഉം ബ്രിട്ടനില്‍ 21,678ഉമാണ്. ഈ അഞ്ചു രാജ്യങ്ങളിലാണ് ലോകത്ത് കൊവിഡ് മരണം ഇരുപതിനായിരം പിന്നിട്ടിരിക്കുന്നത്. അതേസമയം, രോഗം സ്ഥിരീകരിച്ചവരുടെ എണ്ണം ഇറ്റലിയിലും രണ്ടു ലക്ഷം പിന്നിട്ടു. രോഗികളുടെ എണ്ണം പത്തു ലക്ഷം കടന്ന അമേരിക്കയും 2.36 ലക്ഷം കടന്ന സ്‌പെയിനുമാണ് രോഗികളുടെ എണ്ണത്തില്‍ ഇറ്റലിക്കു മുന്നിലുള്ളത്. ഫ്രാന്‍സ്, ബ്രിട്ടന്‍, ജര്‍മനി, തുര്‍ക്കി എന്നീ രാജ്യങ്ങളില്‍ രോഗബാധിതരുടെ എണ്ണം ഒരു ലക്ഷം പിന്നിട്ടപ്പോള്‍, റഷ്യയില്‍ ഒരു ലക്ഷത്തിലേക്ക് അടുക്കുകയാണ്. റഷ്യയില്‍ കഴിഞ്ഞ ദിവസം മാത്രം 105 പേര്‍ രോഗം ബാധിച്ച് മരിച്ചിട്ടുമുണ്ട്.

ലോകത്താകെ 31.70 ലക്ഷം പേര്‍ക്കാണ് കൊവിഡ് ബാധിച്ചിരിക്കുന്നത്. 2.20 ലക്ഷം പേര്‍ മരിച്ചു. 9.79 ലക്ഷം പേര്‍ രോഗവിമുക്തരാകുകയും ചെയ്തു. എന്നാല്‍, ലോകാരോഗ്യ സംഘടനയുടെ ഔദ്യോഗിക കണക്കുപ്രകാരം 2,04,987 പേരാണ് കൊവിഡ് ബാധിച്ച് മരിച്ചിരിക്കുന്നത്. 29,95,758 പേര്‍ക്കു കൊവിഡ് സ്ഥിരീകരിച്ചതായും ഔദ്യോഗിക കണക്കില്‍ വ്യക്തമാക്കുന്നു. 

ജര്‍മനിയില്‍ 6,330, തുര്‍ക്കിയില്‍ 2,992, ഇറാനില്‍ 5,957, ചൈനയില്‍ 4,633, ബ്രസീലില്‍ 5,083, കാനഡയില്‍ 2,859, ബെല്‍ജിയത്തില്‍ 7,501, നെതര്‍ലാന്‍ഡ്‌സില്‍ 4,711, സ്വിറ്റ്‌സര്‍ലാന്‍ഡില്‍ 1,703, അയര്‍ലന്‍ഡില്‍ 1,159, സ്വീഡനില്‍ 2,462, മെക്‌സിക്കോയില്‍ 1,569 എന്നിങ്ങനെയാണ് മരണസംഖ്യ. റഷ്യയില്‍ മരണം ആയിരത്തോടടുത്തിട്ടുണ്ട്.