ന്യൂഡല്‍ഹി: ലോക്ക് ഡൗണ്‍ മൂലം മറ്റു സംസ്ഥാനങ്ങളില്‍ കുടുങ്ങിപ്പോയവര്‍ക്കും കുടിയേറ്റത്തൊഴിലാളികള്‍ക്കും നാട്ടിലേക്ക് മടങ്ങാന്‍ പ്രത്യേക ട്രെയിനുകള്‍ അനുവദിക്കുന്ന കാര്യം കേന്ദ്ര സര്‍ക്കാര്‍ പരിഗണനയില്‍.
ഇതു സംബന്ധിച്ച് കേന്ദ്ര ആരോഗ്യമന്ത്രാലയം വൈകാതെ തീരുമാനമെടുക്കും. 400 ട്രയിനുകള്‍ റയില്‍വേ മന്ത്രാലയം തയാറാക്കി നിര്‍ത്തിയിട്ടുണ്ട്. നിലവില്‍ അന്യസംസ്ഥാന യാത്രക്കായി ബസുകള്‍ ഉപയോഗിക്കാനാണ് കേന്ദ്ര ആഭ്യന്തര മന്ത്രാലയം അനുമതിയുള്ളത്. ദീര്‍ഘദൂര യാത്രകള്‍ ബസില്‍ സാധ്യമല്ലെന്ന് ബോധ്യമായതിന്റെ അടിസ്ഥാനത്തിലാണ് തീവണ്ടികള്‍ കൂടി സജ്ജീകരിക്കാന്‍ തയാറായിരിക്കുന്നത്. ബസുകളില്‍ മാത്രം ഒഴിപ്പിക്കുന്ന നടപടി പ്രായോഗികമല്ലെന്ന് ചില സംസ്ഥാനങ്ങളും ചൂണ്ടിക്കാട്ടിയിരുന്നു. കാബിനറ്റ് സെക്രട്ടറിമായുള്ള വിഡിയോ കോണ്‍ഫറന്‍സില്‍ ഏഴു സംസ്ഥാനങ്ങളിലെ ചീഫ് സെക്രട്ടറിമാര്‍ ഇക്കാര്യം കേന്ദ്രത്തെ ധരിപ്പിക്കുകയും ചെയ്തു. അതിനാല്‍ പ്രത്യേക ട്രയിനുകള്‍ തന്നെ വേണമെന്ന് സംസ്ഥാനങ്ങള്‍ ആവശ്യപ്പെട്ടു. കേരളം തെലങ്കാന, തമിഴ്‌നാട്, മഹാരാഷ്ട്ര, പഞ്ചാബ്, ബിഹാര്‍, രാജസ്ഥാന്‍ എന്നീ സംസ്ഥാനങ്ങളാണ് പ്രധാനമായും എതിര്‍പ്പുന്നയിച്ചിരിക്കുന്നത്.