കോഴിക്കോട്: മടവൂര്‍ സി.എം മഖാമിനു കീഴില്‍ പ്രവര്‍ത്തിക്കുന്ന കോഡിനേഷന്‍ ഓഫ് അശ്അരി കോളജസ് (സി.എ.സി) ലോഞ്ചിങ് ഇന്ന് ഉച്ചയ്ക്ക് രണ്ടിന് കോഴിക്കോട് ഹോട്ടല്‍ എമറാള്‍ഡില്‍ നടക്കും. ജാമിഅ അശ്അരിയ്യ സിലബസ് അടിസ്ഥാനമാക്കി പ്രവര്‍ത്തിക്കുന്ന സ്ഥാപനങ്ങളുടെ കൂട്ടായ്മയാണിത്. എസ്.എസ്.എല്‍.സി പഠനവും മദ്‌റസാ പഠനവും പൂര്‍ത്തിയാക്കിയവര്‍ക്കാണ് പ്രവേശനം ലഭിക്കുക.

ലോഞ്ചിങ് ചടങ്ങ് ഉദ്ഘാടനം സമസ്ത പ്രസിഡന്റും സി.ഐ.സി ചെയര്‍മാനുമായ സയ്യിദ് ജിഫ്‌രി മുത്തുക്കോയ തങ്ങള്‍ നിര്‍വഹിക്കും. പാണക്കാട് സയ്യിദ് ഹമീദലി ശിഹാബ് തങ്ങള്‍ ലോഞ്ചിങ് നിര്‍വഹിക്കും. സമസ്ത സെക്രട്ടറി കെ. ആലിക്കുട്ടി മുസ്‌ലിയാര്‍ മുഖ്യപ്രഭാഷണം നടത്തും. വാവാട് കുഞ്ഞിക്കോയ മുസ്‌ലിയാര്‍, സയ്യിദ് മുഹമ്മദ് കോയ തങ്ങള്‍ ജമലുല്ലൈലി, എം.ടി അബ്ദുല്ല മുസ്‌ലിയാര്‍, ഡോ. ബഹാഉദ്ദീന്‍ മുഹമ്മദ് നദ്‌വി, പി.കെ കുഞ്ഞാലിക്കുട്ടി എം.പി, ഡോ.എം.കെ മുനീര്‍ എന്നിവര്‍ സംബന്ധിക്കും. മുത്താട്ട് അബ്ദുറഹിമാന്‍ മാസ്റ്റര്‍ അധ്യക്ഷനാകും.