തൊടുപുഴ: എസ്.എന്‍.ഡി.പി തൊടുപുഴ യൂണിയന്‍ മുന്‍ പ്രസിഡന്റും സെക്രട്ടറിയും നടത്തിയ മൂന്ന് കോടി പതിനൊന്ന് ലക്ഷം രൂപയുടെ സാമ്പത്തിക തട്ടിപ്പ് ക്രൈംബ്രാഞ്ച് അന്വേഷിക്കാന്‍ ഹൈക്കോടതി ഉത്തരവിട്ടതായി എസ്എന്‍ഡിപി യോഗം തൊടുപുഴ യൂണിയന്‍ സംരക്ഷണ സമിതി ഭാരവാഹികള്‍ വാര്‍ത്താസമ്മേളനത്തില്‍ പറഞ്ഞു. മുന്‍ പ്രസിഡന്റിന്റെയും സെക്രട്ടറിയുടെയും കാലഘട്ടത്തില്‍ നടത്തിയ മൂന്നുകോടി പതിനൊന്ന് ലക്ഷം രൂപയടക്കം എല്ലാ അഴിമതികളും ക്രൈംബ്രാഞ്ച് സാമ്പത്തിക കുറ്റാന്വേഷണ വിഭാഗം അന്വേഷിക്കണമെന്നാണ് ഉത്തരവ്. കല്ലുര്‍ക്കാട്, കലൂര്‍ ശാഖാപ്രസിഡന്റുമാരായ പി വിജയന്‍, കെ എന്‍ മനോജ്, മുട്ടം ശാഖ മുന്‍ സെക്രട്ടറി വി ബി സുകുമാരന്‍, എന്നിവര്‍ സമര്‍പ്പിച്ച ഹര്‍ജിയിലാണ് ഹൈക്കോടതി ഉത്തരവ്.
ഒരു എസ്എന്‍ഡിപി യൂണിയനുകീഴിലുള്ള ആയിരത്തോളം കുടുംബയൂണിറ്റുകളില്‍ ജെഎല്‍ജിയില്‍ നിന്നെടുത്ത ലോണ്‍ യൂണിയനില്‍ അടച്ചത് ബാങ്കില്‍ അടയ്ക്കാതെയാണ് തട്ടിപ്പ് നടത്തിയത്. ഇതുമൂലം സാമ്പത്തികമായി പിന്നോക്കം നില്‍ക്കുന്ന ആയിരക്കണക്കിന് കുടുംബങ്ങളാണ് ജപ്തി ഭീഷണി നേരിടുന്നത്് ലോണ്‍ എടുത്തവകയില്‍ ഓരോ ഗ്രൂപ്പില്‍നിന്ന് പ്രോസസിങ് ഫീ ആയി 1200 രൂപവീതം വാങ്ങിയ 17,87,445രൂപ മുന്‍ സെക്രട്ടറി യൂണിയനില്‍ വരവ് വച്ചിട്ടില്ലെന്ന് ഇപ്പോഴത്തെ കണ്‍വീനര്‍ പറയുന്നു.കഞ്ഞിക്കുഴിയില്‍ യൂണിയനു കീഴില്‍ പ്രവര്‍ത്തിക്കുന്ന ഹൈസ്‌കൂളിലൂം ഹയര്‍ സെക്കന്‍ഡറി സ്‌കൂളിലും നാല് വര്‍ഷക്കാലയളവില്‍ നടന്നിട്ടുള്ള നിര്‍മാണ പ്രവര്‍ത്തനങ്ങളിലും വന്‍ അഴിമതി നടന്നതായി ആരോപണമുണ്ട്. സ്‌കൂളില്‍ ഇല്ലാത്ത തസ്തികയില്‍ നിയമനം നല്‍കാമെന്ന് പറഞ്ഞ് പണം വാങ്ങിയതായും ഇത് സംബന്ധിച്ച് ശാന്തന്‍പാറ പൊലീസ് സ്‌റ്റേഷനില്‍ കേസ് നിലവിലുള്ളതായും അറിയുന്നു. തൊടുപുഴ യൂണിയനുകീഴില്‍ കോടിക്കുളത്ത് പ്രവര്‍ത്തിക്കുന്ന ഗുരുനാരായണ കോളേജിന് വസ്തു വാങ്ങിയ വകയിലും നിര്‍മാണത്തിലും കോടികളുടെ അഴിമതി നടന്നതായി ഓഡിറ്റിങ് വിഭാഗം കണ്ടെത്തിയിരുന്നു.
തട്ടിപ്പിനെതിരെ നിയമനടപടികളുമായി മുന്നോട്ട് പോകാനാണ് സംരക്ഷണസമിതിയുടെ തീരുമാനം. വാര്‍ത്താസമ്മേളനത്തില്‍ പി വിജയന്‍, കെ എന്‍ രാജേഷ്, കെ കെ മനോജ്, വി വി സുകുമാരന്‍, ഇ എന്‍ ബാബു എന്നിവര്‍ പങ്കെടുത്തു.