കോഴിക്കോട്: ഇന്ത്യന്‍ പ്രീമയര്‍ ക്രിക്കറ്റ് ലീഗിന് നേര്‍സാക്ഷിയാകാന്‍ കഴിയാത്തവര്‍ക്കായി കളം നിറഞ്ഞ് കളികാണാന്‍ ഫാന്‍പാര്‍ക്ക് ഒരുങ്ങി. മൈതാനത്തിന്റെ എല്ലാ അനുഭവങ്ങളും പകര്‍ന്നു നല്‍കുന്ന രീതിയില്‍ കോഴിക്കോട് മലബാര്‍ ക്രിസ്ത്യന്‍ കോളജ് ഗ്രൗണ്ടിലാണ് ഫാന്‍ പാര്‍ക്ക് സജ്ജീകരിച്ചിരിക്കുന്നത്. ഫാന്‍ പാര്‍ക്കിലെ കൂറ്റന്‍ സ്‌ക്രീനില്‍ ഇന്നും നാളെയും നടക്കുന്ന ഐ.പി.എല്ലിലെ നാല് മത്സരങ്ങള്‍ പ്രദര്‍ശിപ്പിക്കും. തീര്‍ത്തും സൗജന്യമായ പ്രദര്‍ശനത്തില്‍ ഫുഡ്‌കോര്‍ട്ട്, എന്റര്‍ടെയ്ന്‍മെന്റ്‌സ്, സംഗീത പരിപാടികള്‍ തുടങ്ങിയവയും ഉണ്ടാകും. സിംല മുതല്‍ നാഗര്‍കോവില്‍ വരെ രാജ്യത്തെ  34 കേന്ദ്രങ്ങളിലായി സംഘടിപ്പിച്ചിട്ടുള്ള ഫാന്‍പാര്‍ക്ക് സംവിധാനം ആദ്യമായാണ് കേരളത്തില്‍ പ്രദര്‍ശനം നടത്തുന്നത്. 2015ലാണ് ഫാന്‍പാര്‍ക്ക് പ്രദര്‍ശനം ആരംഭിച്ചത്. കേരള ക്രിക്കറ്റ് അസോസിയേഷനും ജില്ലാ ക്രിക്കറ്റ് അസോസിയേഷനുമാണ് പ്രദര്‍ശനം സംഘടിപ്പിക്കുന്നത്. പതിനായിരത്തോളം ആരാധകരെ ഉള്‍ക്കൊള്ളിക്കാനാകുന്ന രീതിയിലാണ് പ്രദര്‍ശന കേന്ദ്രം ക്രമീകരിച്ചിരിക്കുന്നതെന്ന് സംഘാടകര്‍ പറഞ്ഞു. വാര്‍ത്താസമ്മേളനത്തില്‍ കേരള ക്രിക്കറ്റ് അസോസിയേഷന്‍ അസിസ്റ്റന്റ് സെക്രട്ടറി ഒ.കെ മനോഹരന്‍, എന്‍. അഭിജിത്ത്, രോഹിത്ത് കുമാര്‍ സംബന്ധിച്ചു.