ആലപ്പുഴ: കലക്ടറുടെ സേവനസ്പര്‍ശം പരിപാടിയില്‍ പരാതി നല്‍കാനെത്തിയ നൂറു കണക്കിനു പേര്‍ക്ക് സൗജന്യമായി അപേക്ഷ തയാറാക്കി നല്‍കി എസ്.ഡി കോളജിലെ നാഷണല്‍ സര്‍വീസ് സ്‌കീം യൂനിറ്റ് അംഗങ്ങള്‍ മാതൃകയായി.
എസ്.ഡി കോളജിലെ എന്‍.എസ്.എസ് പ്രോഗ്രാം ഓഫിസര്‍മാരായ കെ.എസ് വിനീത് ചന്ദ്ര, ജെ വീണ എന്നിവരുടെ നേതൃത്വത്തില്‍ 15 പേരടങ്ങിയ സംഘമാണ് സഹായത്തിനെത്തിയത്. അപേക്ഷ നല്‍കേണ്ടതടക്കമുള്ള വിശദവിവരങ്ങളും ഇവര്‍ പറഞ്ഞുകൊടുത്തു.
സേവനസ്പര്‍ശത്തിനെത്തിയവരില്‍നിന്ന് അപേക്ഷ എഴുതുന്നതിന് പണം അമിതമായി ഈടാക്കുന്നതായി ബോധ്യപ്പെട്ടതിനെത്തുടര്‍ന്നാണ് എന്‍.എസ്.എസ്. യൂണിറ്റിന്റെ സഹായം ജില്ലാ ഭരണകൂടം തേടിയത്. എസ്.ഡി.വി സെന്റിനറി ഹാളിനു മുന്നില്‍ അപേക്ഷ എഴുതി നല്‍കാനുള്ള സൗകര്യം ഒരുക്കിയിരുന്നു.
പ്രായമായ നിരവധി പേര്‍ക്ക് ഇവരുടെ സേവനം തുണയായി. കാന്‍സര്‍ അവബോധ പ്രവര്‍ത്തനങ്ങളടക്കം നിരവധി സാമൂഹിക പ്രവര്‍ത്തനങ്ങളില്‍ സജീവമാണ് കോളജിലെ എന്‍.എസ്.എസ് യൂനിറ്റ്.