പാറക്കടവ്: ഉമ്മത്തൂരില്‍ പത്തുവയസുകാരിയെ പീഡിപ്പിച്ച കേസില്‍ അറസ്റ്റിലായ ആര്‍.എസ്.എസ് പ്രവര്‍ത്തകനെതിരേ പ്രതിഷേധം ശക്തമാകുന്നു. അഞ്ചാംക്ലാസില്‍ പഠിക്കുന്ന വിദ്യാര്‍ഥിനിയെ പീഡിപ്പിച്ചുവെന്ന പരാതിയിലാണ് ആര്‍.എസ്.എസ് പ്രവര്‍ത്തകനായ ചോറയില്‍ കുട്ടാപ്പിയെന്ന റിനേഷിനെ (26) വളയം എസ്.ഐ രജീഷ് കുമാറും സംഘവും അറസ്റ്റ് ചെയ്തത്.
പ്രതിയുടെ വീട്ടില്‍ ടി.വി കാണാനെത്തിയ കുട്ടിയെ വീട്ടില്‍വച്ചും  നിര്‍മാണത്തിലിരിക്കുന്ന അയല്‍പക്കത്തെ വീട്ടില്‍വച്ചുമാണ് പീഡനമുണ്ടായത്. കുട്ടിയുടെ അശ്ലീലചിത്രം മൊബൈലില്‍ പകര്‍ത്തിയതായും പരാതിയുണ്ട്.
പീഡനത്തിനിരയായ വിദ്യാര്‍ഥിനി പീഡനം സംബന്ധിച്ച് മാതാവിനോട് പറഞ്ഞതിനെ തുടര്‍ന്ന് നാട്ടുകാര്‍ പൊലിസില്‍ പരാതിപ്പെടുകയായിരുന്നു.  കുട്ടിയെ കല്ലാച്ചി മജിസ്‌ട്രേറ്റിന് മുന്‍പാകെ ഹാജരാക്കി മൊഴിയെടുത്തു. മുന്‍പും അനാശാസ്യ പ്രവര്‍ത്തനങ്ങളില്‍ പിടിയിലായ ഇയാളെ പോക്‌സോ ചുമത്തി കോടതിയില്‍ ഹാജരാക്കി. പ്രതിക്ക് ആര്‍.എസ്.എസ് ഒത്താശ നല്‍കിയെന്നും പ്രതിക്കെതിരേ ശക്തമായ നടപടി സ്വീകരിക്കണമെന്നും പഞ്ചായത്ത് മുസ്‌ലിം ലീഗ് ജനറല്‍ സെക്രട്ടറി സി.എച്ച് ഹമീദ് ആവശ്യപ്പെട്ടു.