കൊല്‍ക്കത്ത: ബി.ജെ.പിയുടെ നേതൃത്വത്തില്‍ രാജ്യവ്യാപകമായി നടത്തുന്ന വിജയ് സങ്കല്‍പ് യാത്രയുടെ ഭാഗമായുള്ള ബൈക്ക് റാലി കൊല്‍ക്കത്തയില്‍ പൊലിസ് തടഞ്ഞു.
ഇതേ തുടര്‍ന്നുണ്ടായ സംഘര്‍ഷത്തില്‍ നിരവധിപേര്‍ക്ക് പരുക്കേറ്റു. അനുമതിയില്ലാതെ റാലി നടത്തിയതാണ് പൊലിസ് തടയാന്‍ കാരണം. കഴിഞ്ഞ വെള്ളിയാഴ്ചയാണ് ബി.ജെ.പി ദേശീയ അധ്യക്ഷന്‍ അമിത്ഷാ ബൈക്ക് റാലി ഉദ്ഘാടനം ചെയ്തത്. വിവിധ സംസ്ഥാനങ്ങളിലായി 3500 ബൈക്ക് റാലികള്‍ സംഘടിപ്പിക്കാനാണ് തീരുമാനം.
ബോര്‍ഡ് പരീക്ഷകള്‍ നടക്കുന്ന സാഹചര്യത്തിലും ഗതാഗത തടസങ്ങള്‍ മുന്‍നിര്‍ത്തിയുമാണ് റാലിക്ക് അനുമതി നിഷേധിച്ചത്. മേദിനിപുരയില്‍ പൊലിസ് ഉയര്‍ത്തിയ ബാരിക്കേഡുകള്‍ ബി.ജെ.പി പ്രവര്‍ത്തകര്‍ തകര്‍ത്തു. ഇതേ തുടര്‍ന്ന് പൊലിസ് നടത്തിയ ലാത്തിച്ചാര്‍ജിലാണ് പലര്‍ക്കും പരുക്കേറ്റത്.