പേരാമ്പ്ര: നൊച്ചാട് പഞ്ചായത്തിലെ ചേനോളിയിലും കക്കാടും സി.പി.എം ആക്രമണം. ചേനോളിയില്‍ വാഹനത്തിന് തീയിട്ടു നശിപ്പിച്ചു. കക്കാട് ലീഗ് ഓഫിസിനു നേരെ ബോംബെറിഞ്ഞു. നൊച്ചാട് പഞ്ചായത്ത് ലീഗ് സെക്രട്ടറി ടി.പി നാസര്‍, കുന്നത്ത് അഹമ്മദ് എന്നിവരുള്‍പ്പെടെ നാലോളം പേര്‍ക്ക് പരുക്കേറ്റു. ഇവരെ കോഴിക്കോട് മെഡിക്കല്‍ കോളജില്‍ പ്രവേശിപ്പിച്ചു. പ്രദേശത്ത് സംഘര്‍ഷം തുടരുകയാണ്.കഴിഞ്ഞ ദിവസങ്ങളിലും പ്രദേശത്ത്  അക്രമസംഭവങ്ങളുണ്ടായിരുന്നു. അക്രമങ്ങള്‍ക്ക് അറുതി വരുത്താന്‍ പൊലിസിനോ രാഷ്ട്രീയ നേതൃത്വത്തിനോ കഴിയുന്നില്ല. സംഘര്‍ഷം നിലനില്‍ക്കുന്ന ഇവിടെ കഴിഞ്ഞ ദിവസം വീടുകള്‍ക്കു നേരേ ബോംബേറും നടന്നിരുന്നു. അനിഷ്ട സംഭവങ്ങള്‍ തുടരുന്നത് പൊലിസിന്റെ നിഷ്‌ക്രിയത്വം കൊണ്ടാണെന്നാണ്  രാഷ്ട്രീയ പാര്‍ട്ടികളുടെയും പൊതുജനങ്ങളുടെയും അഭിപ്രായം.