തിരുവനന്തപുരം: കേരള സാങ്കേതിക സര്‍വകലാശാലയിലെ വിവിധ സെമസ്റ്റര്‍ പരീക്ഷകളുടെ തിയതികള്‍ ലോക്ക് ഡൗണിനു ശേഷം പ്രഖ്യാപിക്കുമെന്ന് വൈസ് ചാന്‍സലര്‍ ഡോ. എം.എസ് രാജശ്രീ അറിയിച്ചു. അവസാന വര്‍ഷ വിദ്യാര്‍ഥികളുടെ പരീക്ഷകള്‍ക്കാണ് മുന്‍ഗണന. വിദ്യാര്‍ഥികളുടെ ഉന്നത പഠന സാധ്യതകളും കാംപസ് പ്ലേസ്‌മെന്റിലൂടെ ജോലി ലഭിച്ചവരുടെ തൊഴിലവസരങ്ങളും നഷ്ടമാകാത്ത രീതിയില്‍ പരീക്ഷകള്‍ ക്രമീകരിക്കും.
യു.ജി.സി നിര്‍ദേശങ്ങള്‍ക്ക് അനുസൃതമായി പരീക്ഷാ ക്രമീകരണങ്ങള്‍ക്കുള്ള ശുപാര്‍ശകള്‍ സമര്‍പ്പിക്കാന്‍ ഡോ. സി. സതീഷ് കുമാറിന്റെ നേതൃത്വത്തില്‍ അക്കാദമിക് കൗണ്‍സിലിന്റെ ഉപസമിതി രൂപീകരിച്ചിട്ടുണ്ട്. മേയ് രണ്ടാംവാരം കൂടുന്ന അക്കാദമിക് കൗണ്‍സില്‍ ഈ നിര്‍ദേശങ്ങളില്‍ അന്തിമ തീരുമാനമെടുക്കുമെന്നും വൈസ് ചാന്‍സലര്‍ അറിയിച്ചു.