മട്ടാഞ്ചേരി: സാധാരണക്കാര്‍ ഏറെ ആശ്രയിക്കുന്ന ഫോര്‍ട്ട്‌കൊച്ചി സര്‍ക്കാര്‍ താലൂക്ക് ഹെഡ് ക്വാര്‍ട്ടേഴ്‌സ് ആശുപത്രിയിലെ ഗൈനക്കോളജി വിഭാഗം നിര്‍ത്തിയിട്ട് ആറ് മാസം പിന്നിടുന്നു. പ്രസവ ചികിത്സക്കായി വരുന്നവരുടെ എണ്ണം കുറഞ്ഞുവെന്ന കാരണത്താലാണ് ഈ വിഭാഗം നിര്‍ത്തിയത്. എന്നാല്‍ ഇവിടെ ഗൈനക്കോളജി വിഭാഗത്തില്‍ ജോലി ചെയ്തിരുന്ന രണ്ട് ഡോക്ടര്‍മാരുടെ അനാസ്ഥയാണ് ഇതിന് കാരണമെന്നും ഇവര്‍ക്ക് പകരം പുതിയ ഡോക്ടര്‍മാരെ നിയമിക്കണമെന്നും ആവശ്യപ്പെട്ട് നിരവധി പരാതികളും നിവേദനങ്ങളും അധികൃതര്‍ക്ക് സമര്‍പ്പിച്ചെങ്കിലും അതിന് പകരം ഈ വിഭാഗം തന്നെ ആശുപത്രിയില്‍ നിന്ന് നീക്കുന്ന നടപടിയാണ് ആരോഗ്യ വകുപ്പ് സ്വീകരിച്ചത്.
വളരെ നല്ല നിലയിലായിരുന്നു ഇവിടെ ഗൈനക്കോളജി വിഭാഗം പ്രവര്‍ത്തിച്ചിരുന്നത്. ഓപറേഷന്‍ തിയേറ്റര്‍, ലേബര്‍ റൂം, മികച്ച ശിശുരോഗ വിഭാഗം അടക്കം മികച്ച സംവിധാനങ്ങളുള്ള ആശുപത്രിയില്‍ ഗൈനക്കോളജി വിഭാഗം നിര്‍ത്താന്‍ കാരണമെന്തന്നാണ് നാട്ടുകാരുടെ ചോദ്യം. ഗൈനക്കോളജി വിഭാഗം നിര്‍ത്തനുള്ള തീരുമാനം വന്നതിന് പിന്നാലെ യൂത്ത് കോണ്‍ഗ്രസ് അടക്കമുള്ള നിരവധി സംഘടനകള്‍ പ്രതിഷേധവുമായി രംഗത്ത് വന്നിരുന്നു.യൂത്ത് കോണ്‍ഗ്രസിന്റെ നേതൃത്വത്തില്‍ ആശുപത്രിക്ക് മുന്നില്‍ റീത്ത് വെച്ചുള്ള പ്രതിഷേധവും അരങ്ങേറി. പ്രതിഷേധം ശക്തമായപ്പോള്‍ ഗൈനക്കോളജി വിഭാഗം തുടരുവാനുള്ള നടപടികള്‍ സ്വീകരിക്കുമെന്ന് അധികൃതര്‍ പറഞ്ഞെങ്കിലും സമരം തണുത്തതോടെ വാക്ക് പാലിക്കാതെ അധികൃതര്‍ പിന്‍മാറുകയായിരുന്നു. ഇതോടെ ഈ ആശുപത്രിയിലെ രണ്ട് തസ്തിക തന്നെയില്ലാതാകുമെന്നാണ് സൂചന.
ഗൈനക്കോളജി വിഭാഗത്തിലേക്ക് ഇങ്ങോട്ട് ഡോക്ടര്‍മാര്‍ വരാന്‍ തയ്യാറാണെങ്കിലും അധികൃതര്‍ ഗൗനിക്കാത്ത സാഹചര്യമാണ്. പടിഞ്ഞാറന്‍ കൊച്ചിയോട് അധികൃതര്‍ നിരന്തരമായി തുടരുന്ന അവഗണനയുടെ മറ്റൊരു ഉദാഹരണമായി മാറിയിരിക്കുകയാണ് ഇത്.ഗൈനക്കോളജി വിഭാഗം ഇവിടെ തുടരുവാന്‍ നടപടി സ്വീകരിക്കണമെന്നാവശ്യപ്പെട്ട് പ്രക്ഷോഭം വീണ്ടും തുടങ്ങുവാനുള്ള തയ്യാറെടുപ്പിലാണ് വിവിധ സംഘടനകള്‍.