റിയാദ്: സ്വദേശികള്‍ക്ക് കൂടുതല്‍ തൊഴില്‍ മേഖല സൃഷ്ടിക്കുന്നതിനായി രാജ്യത്തെ റസ്റ്ററന്റ്, കോഫിഷോപ്പ് എന്നിവിടങ്ങളിലെ സഊദിവല്‍ക്കരണ തോത് ഉയര്‍ത്താന്‍ തീരുമാനം.

നിലവിലെ സഊദിവല്‍ക്കരണ തോതില്‍ നിന്നും 30 ശതമാനത്തിലേക്ക് ഉയര്‍ത്താനാണ് തീരുമാനിച്ചിരിക്കുന്നത്. ഇതിനായി തൊഴില്‍ മന്ത്രാലയവും റസ്റ്ററന്റ് ആന്‍ഡ് കഫേ അസോസിയേഷനും തമ്മില്‍ കരാറില്‍ ഒപ്പുവച്ചു.

ഇത് പ്രാബല്യത്തില്‍ വരുന്നതോടെ ഈ മേഖലയില്‍ നിരവധി വിദേശികള്‍ക്കാണ് തൊഴില്‍ നഷ്ടമാകുക. പുതിയ തീരുമാനപ്രകാരം ഈ മേഖലയില്‍ പുതുതായി 50,000ത്തോളം തൊഴിലവസരങ്ങള്‍ ലഭിക്കുമെന്നാണ് കണക്കാക്കുന്നത്. നിലവില്‍ 36,542 സ്വദേശികളാണ് ഈ മേഖലയില്‍ തൊഴിലെടുക്കുന്നത്. ഇതില്‍ 1156 വനിതകള്‍ മാത്രമാണ് മേഖലയില്‍ സാന്നിധ്യമറിയിച്ചത്.

അതേസമയം 3588 സ്ത്രീകളുള്‍പ്പെടെ മൂന്നു ലക്ഷത്തോളം വിദേശികളാണ് ഈ മേഖലയില്‍ ജോലി ചെയ്യുന്നത്. നിയമം പ്രാവര്‍ത്തികമാകുന്നതോടെ ഇവരില്‍ നാലില്‍ ഒരുവിഭാഗം വിദേശികള്‍ക്ക് തൊഴില്‍ നഷ്ടമാകും.

സഊദിവല്‍ക്കരണത്തിനു പുറമെ മേഖലയിലെ വളര്‍ച്ചക്കും പുരോഗതിക്കും ഉതകുന്ന വിവിധ പദ്ധതികളും രൂപപ്പെടുത്താനും കരാറുണ്ട്.
റസ്റ്ററന്റുകളിലും കോഫി ഷോപ്പുകളിലും സംഗീത കോമഡി പരിപാടികള്‍ അവതരിപ്പിക്കുന്നതിന് അനുമതി നല്‍കാന്‍ തീരുമാനിച്ചതും ഈ മേഖലയിലെ വളര്‍ച്ചക്ക് ആക്കംകൂട്ടുമെന്നാണ് വിലയിരുത്തപ്പെടുന്നത്.

അതേസമയം സഊദിയില്‍ വിനോദമേഖലയില്‍ രണ്ടുലക്ഷത്തിലധികം തൊഴിലുകള്‍ സൃഷ്ടിക്കാന്‍ പദ്ധതി തയാറാക്കുന്നതായി ജനറല്‍ എന്റര്‍ടെയ്ന്‍മെന്റ് അതോറിറ്റി സി.ഇ.ഒ അംറ് ബനാജ വ്യക്തമാക്കി. ഇതിനായി സമഗ്ര പദ്ധതികള്‍ ആവിഷ്‌ക്കരിച്ചുവരുന്നതായും അദ്ദേഹം കൂട്ടിച്ചേര്‍ത്തു.