കിളിമാനൂര്‍: അമിത വേഗതയില്‍ വന്ന പൊലിസ് വാഹനം നിയന്ത്രണം വിട്ട് റോഡിലെ ഡിവൈഡറും കടന്ന് കട ഇടിച്ചു തകര്‍ത്തു. കടക്ക് മുന്നിലെ ഓടയിലെ സ്ലാബ് തകര്‍ന്ന് വാഹനത്തിന്റെ ചക്രം കുടുങ്ങിയാല്‍ കടയില്‍ കിടന്ന് ഉറങ്ങുകയായിരുന്നയാള്‍ രക്ഷപ്പെട്ടു.
ഇന്നലെ പുലര്‍ച്ചെ ഒരു മണിയോടെ കിളിമാനൂര്‍ ജങ്ഷനിലെ സ്വാമിജി ബേക്കേഴ്‌സ് എന്ന കടയാണ് പൊലിസ് വാഹനം ഇടിച്ചു തകര്‍ത്തത്. കടയുടെ വരാന്തയില്‍ കിടന്നുറങ്ങുകയായിരുന്ന കിളിമാനൂര്‍ വണ്ടന്നൂര്‍ സ്വദേശി ശ്രീകുമാര്‍ ആണ് രക്ഷപ്പെട്ടത്. തിരുവനന്തപുരത്ത് നിന്ന് എറണാകുളത്തേക്ക് പോവുകയായിരുന്നു എറണാകുളം റൂറലിലെ ടെമ്പോ ട്രാവലര്‍.
ഡ്രൈവര്‍ മാത്രമേ വാഹനത്തില്‍ ഉണ്ടായിരുന്നുള്ളു. ജങ്ഷനില്‍ റോഡിന് മധ്യഭാഗത്ത് ഡിവൈഡര്‍ ഉണ്ട്. ഇതും മറികടന്നാണ് കടയിലേക്ക് വാഹനം പാഞ്ഞു കയറിയത്.