പൊന്നാനി: അപൂര്‍വ നാണയങ്ങളും കറന്‍സികളും ശേഖരിക്കുന്നത് തപസ്യയാക്കിയിരിക്കുകയാണ് പാലപ്പെട്ടി പുതിയിരുത്തി സ്വദേശി നസീര്‍.
ഏഴു ഭൂഖണ്ഡങ്ങളിലെയും രാജ്യങ്ങളുടെ അപൂര്‍വവും അല്ലാത്തതുമായ കറന്‍സികള്‍ നസീറിന്റെ ശേഖരത്തിലുണ്ട്. പടിഞ്ഞാറെയില്‍ നസീറിന് കറന്‍സി ശേഖരം ഒരു ഹോബിയല്ല, ജീവിതം തന്നെയാണ്.
പതിനഞ്ചുവര്‍ഷം മുമ്പാണ് ഒരു കൗതുകത്തിന് കറന്‍സി ശേഖരണം തുടങ്ങിയത്. പിന്നീടത് ഒരു ആവേശമായി. കിട്ടാവുന്ന കറന്‍സികളും നാണയങ്ങളും ശേഖരിക്കാന്‍ തുടങ്ങി. ദുബൈ ദേര മാര്‍ക്കറ്റില്‍ കട നടത്തുന്ന  നസീറിന് കറന്‍സി ശേഖരണം കെടാത്ത ആവേശമാണ്. വിവിധ രാജ്യങ്ങളില്‍ നിന്നുള്ളവര്‍  എത്തിയിരുന്നതിനാല്‍ കറന്‍സി ശേഖരണം എളുപ്പമായി.
ചില യൂറോപ്യന്‍ രാജ്യങ്ങളുടെ കറന്‍സികള്‍ ഏറെ  പ്രയാസപ്പെട്ടാണ് നസീര്‍ സ്വന്തമാക്കിയത്. വിവിധ രാജ്യങ്ങളുടെ അഞ്ഞൂറില്‍ പരം കറന്‍സികള്‍ നസീറിന്റെ ശേഖരത്തിലുണ്ട്. കുടുംബത്തിന്റെ പ്രോത്സാഹനം വേണ്ടുവോളമുള്ളതിനാല്‍ കറന്‍സി നാണയശേഖരം തനിക്ക് ഏറെ സന്തോഷം നല്‍കുന്നതായി നസീര്‍ പറയുന്നു.