വണ്ടൂര്‍: നാലു വരിപ്പാതയുടെ റബറൈസ്ഡ് പ്രവൃത്തി എട്ടു ദിവസത്തിനകം പൂര്‍ത്തിയാക്കുമെന്ന് പൊതുമരമാത്ത് വകുപ്പ് അധികൃതര്‍ പറഞ്ഞു. രാഷ്ട്രീയ വിവാദങ്ങളും അഴിമതിയാരോപണവുമെല്ലാമായി ഒന്നിലധികം തവണ തടസ്സപെട്ട റോഡ് പണിയില്‍ റബറൈസ്ഡ് പ്രവൃത്തിയാണ് ദിവസങ്ങള്‍ക്കകം പൂര്‍ത്തിയാകുക. ഓവുചാലും നടപ്പാതയും ഡിവൈഡര്‍ മോടി കൂട്ടലുമെല്ലാം  ഇനി തുകയനുവദിക്കുന്ന മുറക്ക് നടത്തുമെന്നാണ് പൊതുമരാമത്ത് വകുപ്പിന്റെ നിലപാട്.
എന്നാല്‍ യു.ഡി.എഫ് സര്‍ക്കാര്‍ അനുവദിച്ച ഒരു കോടി രൂപയുടെ ഭരണാനുമതി എല്‍.ഡി.എഫ് സര്‍ക്കാര്‍ റദ്ദാക്കിയിരുന്നു. ഇതോടെ ഈ പണികളെല്ലാം പാതി വഴിയില്‍ നിലക്കുമെന്നുറപ്പാണ്. കഴിഞ്ഞ ഡിസംബറില്‍ റബറൈസ്ഡ് പണി നടന്നു കൊണ്ടിരിക്കെ അടങ്കലില്‍ കാണിച്ച രീതിയിലല്ല പണി നടക്കുന്നതെന്നാരോപിച്ച് ഡി.വൈ.എഫ്.ഐ പ്രവര്‍ത്തകരുടെ നേതൃത്വത്തില്‍ ഒരു വിഭാഗം നാട്ടുകാര്‍ പണി തടഞ്ഞിരുന്നു. കഴിഞ്ഞ യു.ഡി.എഫ് സര്‍ക്കാറിന്റെ അവസാന കാലത്താണ് പൊതുമരാമത്ത് വകുപ്പ് നാലു കോടി രൂപ നഗര സൗന്ദര്യവത്കരണത്തിനായി അനുവദിച്ചത്.
മഞ്ചേരി റോഡില്‍ ബോയ്‌സ് സ്‌കൂള്‍ വരെയുള്ള ഭാഗം നാലു വരിപ്പാതയാക്കി വഴിയാത്രക്കാര്‍ക്ക് ഇരുഭാഗത്തും ഓട് പാകിയ നടപ്പാതയും ഇതിനു സംരക്ഷണ വേലിയും ഓവുചാലുകളും,ചെടികള്‍ വെച്ചു പിടിപ്പിച്ച ഡിവൈഡറുകളുമെല്ലാമായിരുന്നു പദ്ധതിയലുദ്ദേശിച്ചിരുന്നത്.