റിയാദ്: നാട്ടിലേക്ക് പോകുന്നതിനായി തയ്യാറെടുത്ത ജിദ്ദയിലെ മലബാർ പ്രവാസികൾക്ക് ആശ്വാസമായി ജിദ്ദയിൽ നിന്നും കരിപ്പൂരിലേക്ക് വിമാനം പറക്കും. 13 നാണു ജിദ്ദയിൽ നിന്നും കരിപ്പൂരിലേക്ക് സർവ്വീസ് നടത്തുന്നത്. നേരത്തെ ഇവിടെ നിന്നും നിന്നും ഡൽഹിയിലേക്ക് ഇതേ ദിവസം നിശ്ചയിച്ച എയര്‍ ഇന്ത്യ സർവ്വീസ് ആളുകൾ കുറവായതിനെ തുടർന്നാണ് കോഴിക്കോട്ടേക്ക് മാറ്റിയതെന്നാണ് വിവരം. ഇതോടൊപ്പം മെയ് 14ന് ജിദ്ദയിൽ നിന്നും കൊച്ചിയിലേക്ക് നേരത്തെ നിശ്ചയിച്ചിരുന്ന സർവ്വീസ് മാറ്റമില്ലാതെ നടത്തുമെന്നും ഇന്ത്യൻ എംബസി അധികൃതർ അറിയിച്ചു. ഇതോടെ കേരളത്തിലേക്കുള്ള അടിയന്തിര സർവീസുകളുടെ എണ്ണം നാലായി ഉയർന്നു.

     കഴിഞ്ഞ ദിവസം റിയാദില്‍ നിന്നും കരിപ്പൂരിലേക്കുള്ള വിമാനത്തില്‍ മുഴുവന്‍ സീറ്റിലും ആളുണ്ടായിരുന്നപ്പോൾ ഇന്ന് റിയാദില്‍ നിന്നും ഡല്‍ഹിയിലേക്ക് പോയ 162 സീറ്റുള്ള വിമാനത്തില്‍ 139 യാത്രക്കാര്‍ മാത്രമാണ് ഉണ്ടായിരുന്നത്. ഇത് എയര്‍ ഇന്ത്യക്ക് നഷ്ടമുണ്ടാക്കുമെന്നതിനെ തുടർന്നാണ് ജിദ്ദയിൽ നിന്നുള്ള ഡൽഹി വിമാനം നിർത്തലാക്കി പകരം കേരളത്തിലേക്ക് തന്നെ സർവ്വീസ് നടത്താൻ തീരുമാനിച്ചതിന് പിന്നിൽ. യാത്രക്കാരെ സ്വീകരിക്കാന്‍ ഡല്‍ഹിയില്‍ മതിയായ ഒരുക്കങ്ങളില്ലാത്തതും യാത്രക്കാരെ അകറ്റുന്നതായാണ് വിവരം.

     ജിദ്ദ-കോഴിക്കോട് സെക്ടറിൽ എകോണമി ക്ലാസിന് മറ്റു ചാർജുകൾ കൂടാതെ ടിക്കറ്റ് നിരക്ക് മാത്രം 950 റിയാലാണ് ഈടാക്കുക. ജിദ്ദ-കൊച്ചി സെക്ടറിൽ 1200 റിയാലും മറ്റ് ഫീസുകളുമാണ് ഈടാക്കുക. പുതിയ മാറ്റമനുസരിച്ച് മെയ് 13ന് ജിദ്ദയിൽ നിന്നും കോഴിക്കോട്ടേക്കും, മെയ് 14ന് ജിദ്ദയിൽ നിന്നും കൊച്ചിയിലേക്കും വിമാന സർവ്വീസുകളുണ്ടായിരിക്കും. പുതിയ സര്‍വീസ് കോഴിക്കോട്ടേക്ക് മാറ്റിയതോടെ തുടര്‍ച്ചയായി രണ്ട് ദിവസം മലയാളികള്‍ക്ക് ജിദ്ദയില്‍ നിന്നും യാത്രക്ക് വഴിയൊരുങ്ങി. ജിദ്ദയിൽ നിന്നും മലബാർ മേഖലയിലെ ആളുകൾക്ക് ആശ്വാസമേകി വിമാന സർവ്വീസ് പ്രഖ്യാപിക്കണമെന്ന പ്രവാസികളുടെ ആവശ്യം "സുപ്രഭാതം" കഴിഞ്ഞ ദിവസം പ്രസിദ്ധീകരിച്ചിരുന്നു.

    അതേസമയം, കേന്ദ്ര സർക്കാർ പ്രഖ്യാപിച്ച അടിയന്തിര വിമാന സർവ്വീസിലെ രണ്ടാം ദിവസം റിയാദിൽ നിന്നും ഡൽഹിയിലേക്ക് 139 യാത്രക്കാർ പുറപ്പെട്ടതായി ഇന്ത്യൻ എംബസി അറിയിച്ചു. മന്ത്രാലയത്തിന്റെ മുഴുവൻ നടപടിക്രമങ്ങളും പൂർത്തീകരിച്ചാണ് വിമാനം യാത്ര തിരിച്ചത്. യാത്രക്കാരിൽ 14 സ്‌ത്രീകളും എട്ട് കുട്ടികളുമാണ് ഉൾപ്പെട്ടത്.