ന്യൂഡല്‍ഹി: ഏദന്‍ ഉള്‍ക്കടലില്‍ കടല്‍ക്കൊള്ളക്കാരെ തുരത്താന്‍ ഇന്ത്യാ-ചൈന നാവിക സേനകള്‍ സംയുക്ത നീക്കം നടത്തി. കഴിഞ്ഞ ശനിയാഴ്ച രാത്രിയാണ് മലേഷ്യയിലെ കെലാംഗില്‍ നിന്ന് ഏദനിലേക്ക് പോവുകയായിരുന്ന ടുവാലു എന്ന കപ്പലിനെ കടല്‍ക്കൊള്ളക്കാര്‍ ആക്രമിച്ചത്. കൊള്ളക്കാരുടെ ആക്രമണത്തെ തകര്‍ത്ത് തോല്‍പ്പിച്ച് കപ്പലിനെ രക്ഷിക്കുന്നതില്‍ ഇരു രാജ്യങ്ങളുടെയും സംയുക്ത നീക്കം സഹായകമായി.
കപ്പലിനെ ആക്രമിക്കാന്‍ കൊള്ളക്കാര്‍ എത്തിയെന്ന സന്ദേശം ശ്രദ്ധയില്‍പ്പെട്ട ഇന്ത്യന്‍ നാവികസേനാ കപ്പലുകളായ ഐ.എന്‍.എസ് മുംബൈ, ഐ.എന്‍.എസ് തര്‍കാഷ് എന്നിവ രക്ഷാപ്രവര്‍ത്തനം തുടങ്ങി. ടുവാലു കപ്പലിന്റെ ക്യാപ്റ്റനും മറ്റ് ജീവനക്കാരും മുറിയില്‍ കയറി ഒളിച്ചിരിക്കുകയായിരുന്നു. ഇവരുമായി ഇന്ത്യന്‍ വ്യോമ സേന ബന്ധപ്പെട്ടു. ഉടന്‍ സമീപത്തുണ്ടായിരുന്ന ചൈനീസ്, പാക്, ഇറ്റാലിയന്‍ നാവിക സേനാ കപ്പലുകളും രക്ഷക്കായി എത്തി.
ചൈനീസ് നാവിക സേനാംഗങ്ങള്‍ കൊള്ളക്കാരെ നേരിടാനായി കപ്പലില്‍ പ്രവേശിച്ചതോടെ ഇവര്‍ക്ക് സംരക്ഷണമൊരുക്കി ഇന്ത്യന്‍ നാവിക സേനയുടെ ഹെലികോപ്റ്ററുകള്‍ തയാറായി. ഇതിനിടയില്‍ കൊള്ളക്കാരെ നേരിടാന്‍ പാക്, ഇറ്റാലിയന്‍ കപ്പലുകളും എത്തി. പിന്നീട് സംയുക്ത നീക്കത്തിലൂടെ കൊള്ളക്കാരെ കീഴടക്കി കപ്പല്‍ ജീവനക്കാരെ രക്ഷപ്പെടുത്തി.
ഏദന്‍ കടലിടുക്ക് കടല്‍ക്കൊള്ളക്കാരുടെ സ്ഥിരം താവളമായിരുന്നു. ശക്തമായ നീക്കത്തിലൂടെ ഇത് അവസാനിപ്പിച്ചതായിരുന്നുവെങ്കിലും ഇപ്പോള്‍ വീണ്ടും കൊള്ളക്കാര്‍ സജീവമായതായാണ് ഈ സംഭവം വെളിപ്പെടുത്തുന്നത്.