പാലക്കാട് : മലമ്പുഴ അകമലവാരം മേട്ടുപ്പതി ആദിവാസികോളനിയിലെ 30 കുടുംബങ്ങള്‍ക്ക് കുടിക്കാനിത്തിരി വെള്ളം കിട്ടണമെങ്കില്‍ ഓരോ തവണയും വാട്ടര്‍ ടാങ്കിനു മുകളില്‍ കയറി വാല്‍വ് തുറന്നുവിടണം.ആവശ്യം കഴിഞ്ഞാല്‍ വീണ്ടും കയറി വാല്‍വ് അടക്കണം.അതുകൊണ്ട് സ്ത്രീകളും വാല്‍വ് അടക്കാനും,തുറക്കാനും ഇരുമ്പ് ഏണിവഴി ടാങ്കിനു മുകളിലെത്തണം. തുടക്കത്തില്‍ എല്ലാവീടുകളുടെ മുന്‍പിലും ഓരോ പൈപ്പ് സ്ഥാപിച്ചിരുന്നു.ആറ് മാസത്തോളം ടാപ്പിലൂടെ വെള്ളവും ലഭിച്ചിരുന്നു.പിന്നീട് അടിയിലൂടെഇട്ട പൈപ്പ് മുഴുവന്‍ നശിച്ചു പോയി.ഇതോടെ വീട്ടിനു മുന്നിലെ പൈപ്പിലൂടെ ലഭിച്ചിരുന്ന കുടിവെള്ളം മുട്ടി.പൈപ്പുകള്‍ തുരുമ്പിച്ചു് നശിച്ചു
രാജീവ് ഗാന്ധി കുടിവെള്ള പദ്ധതിയുടെ ഭാഗമായി സ്ഥാപിച്ചതാണ് വാട്ടര്‍ ടാങ്കും. പൈപ്പ് ലൈനും വെള്ളം വീട്ടിനു മുന്നിലെത്താതായതോടെ ഓരോ വീട്ടുകാരും സമീപത്തെ തോട്ടങ്ങളില്‍ നച്ചിരുന്ന വലിയ പ്‌ളാസ്റ്റിക് പൈപ്പുകള്‍ ഇട്ടൂ നാലും അഞ്ചും വീട്ടുകാര്‍ ഒന്നിച്ചു് കുടിവെള്ളം പിടിക്കുകയാണ് ചെയ്തു വരുന്നത്.
സ്വകാര്യ തോട്ടമുടമകള്‍ ഇപ്പോള്‍ വെള്ളമെടുക്കുന്ന പ്‌ളാസ്റ്റിക് പൈപ്പ് തിരിച്ചു് വേണമെന്നാവശ്യപ്പെട്ടാല്‍ മേട്ടുപതിയിലെ 30 കുടുംബങ്ങളുടെ കുടിവെള്ളം മുട്ടും. പലതവണ പഞ്ചായത്തിലെത്തി പരാതി നല്‍കിയെങ്കിലും നിങ്ങള്‍ക്ക് വെള്ളം വേണമെങ്കില്‍ ഈ രീതി തന്നെ തുടരാനാണ് അധികാരികളും,വാര്‍ഡ് മെമ്പറുമൊക്കെ പറയുന്നതെന്ന് ഇവിടത്തുകാര്‍ പറയുന്നു.  ഇപ്പോള്‍ അഞ്ചു വര്‍ഷമായിവെള്ളമടിക്കലും,കറന്റ് ചാര്‍ജ് അടക്കലും ഉപഭോക്താക്കള്‍ തന്നെ. മോട്ടോര്‍ കേടുവന്നാല്‍ നന്നാക്കാനുള്ള ചിലവും വീട്ടുകാര്‍ ഒന്നിച്ചു് വഹിക്കണം. പണിയൊന്നുമില്ലാതെ അന്നന്നത്തെ അന്നത്തിനായി പെടാപാട് പെടുന്ന മേട്ടൂപ്പതിയിലെ ആദിവാസി കുടുംബങ്ങള്‍ കുടിക്കാനിത്തിരി വെള്ളത്തിനായി ദുരിതം അനുഭവിക്കുകയാണ്.