പിണറായി: പൂച്ചകള്‍ വെട്ടേറ്റ് ചത്ത നിലയില്‍ കണപ്പെടുന്നത് പതിവായതോടെ സംഭവത്തില്‍ പൊലിസ് അന്വേഷണം ആരംഭിച്ചു. പിണറായി ഓലയമ്പലം ടൗണിനടുത്താണ് കഴിഞ്ഞദിവസം ഒരു പൂച്ചയെ കാലുകളും കൈകളും വെട്ടിമാറ്റപ്പെട്ട നിലയില്‍ കണ്ടെത്തിയത്. ആശുപത്രി റോഡിലും സമാനമായ രീതിയില്‍ പൂച്ചയെ കണ്ടെത്തി. പൂച്ചകള്‍ക്ക് നേരെ അക്രമം നടത്തുന്നത് പ്രത്യേക ഉദ്ദേശത്തോടെയാണെന്നാണ് പൊലിസിന് ലഭിക്കുന്ന സൂചന. മാസങ്ങള്‍ക്ക് മുമ്പ് പ്രദേശത്ത് നായകളും ഇത്തരത്തില്‍ വെട്ടേറ്റ നിലയില്‍ കണ്ടെത്തിയിരുന്നു. കാലുകള്‍ വെട്ടിമാറ്റപ്പെട്ട രീതിയിലായിരുന്നു നായകള്‍. ജില്ലയില്‍ മുന്‍പും സമാനമായ രീതിയില്‍ വളര്‍ത്ത് മൃഗങ്ങള്‍ക്ക് വെട്ടേറ്റിട്ടുണ്ട്. പ്രത്യേക സംഘം ആക്രമണം നടത്തുന്നത് പരിശീലനം നടത്തുന്നതാണോ എന്ന സംശയമാണ് പൊലിസിനുള്ളത്.