പേരാമ്പ്ര: ചേനോളിയില്‍ സി.പി.എം മുന്‍കൂട്ടി തയാറാക്കിയ പദ്ധതി പ്രകാരമാണ് ആക്രമണമെന്ന് സി.പി.എം ആക്രമിസംഘം നല്‍കുന്ന സൂചനകള്‍ വ്യക്തമാകുന്നു. സാമൂഹ്യ മാധ്യമങ്ങള്‍ വഴി സന്ദേശം നല്‍കി പ്രദേശത്തെ ഭീതിയില്‍ നിര്‍ത്തുന്ന അക്രമണങ്ങള്‍ നാലോളം ഭാഗങ്ങളില്‍ അരങ്ങേറുകയായിരുന്നു. മുസ്‌ലിം ലീഗ് നേതാക്കളുടെ വീടുകളും സ്ഥാപനങ്ങളും കോഴി ഫാമും പ്രദേശത്തെ പ്രവര്‍ത്തകരുടെ സഹായത്തോടെ നശിപ്പിക്കുകയായിരുന്നു.
പ്രതികളായവര്‍ പഞ്ചായത്തിന്റെ വിവിധ ഭാഗങ്ങളില്‍ നിന്ന് സംഘടിച്ചെത്തിയവരാണ്. സി.പി.എം പ്രവര്‍ത്തകരായ അഞ്ചു പേരെ സംഭവത്തില്‍ പൊലിസ് അറസ്റ്റ് ചെയ്തു. രണ്ടു വീടുകള്‍ ആക്രമിച്ച കേസില്‍ മുനീര്‍ നൊച്ചാടിന്റെയും കുണ്ടുങ്ങല്‍ അഹമദിന്റെയും പരാതിയിലും കോഴി ഫാം കത്തിച്ചതിനും ബൈക്ക് കത്തിച്ച സംഭവത്തിലും കേസെടുത്തിട്ടുണ്ട്. ലീഗ് നേതാവ് ടി.പി നാസറിനെ മര്‍ദിച്ച കേസില്‍ കണ്ടാലറിയാവുന്ന അന്‍പതോളം പേര്‍ക്കെതിരേയും കേസെടുത്തു.
ചേനോളിയില്‍ മരകായുധങ്ങളുമായി പഞ്ചായത്തിന്റെ വിവിധ ഭാഗങ്ങളില്‍ നിന്നായി നൂറോളം പേര്‍ സംഘടിച്ചെത്തിയതായി ദൃക്‌സാക്ഷികള്‍ പറയുന്നു.