കോഴിക്കോട്: സി.വി കുഞ്ഞുരാമന്‍ സാഹിത്യ പുരസ്‌കാരം പുനത്തില്‍ കുഞ്ഞബ്ദുല്ലയ്ക്ക് എം. മുകുന്ദന്‍ സമ്മാനിച്ചു. കോഴിക്കോട് പണിക്കര്‍ റോഡില്‍ പുനത്തില്‍ താമസിക്കുന്ന ഫഌറ്റില്‍ നടന്ന ചടങ്ങിലാണ് പുരസ്‌കാരം സമ്മാനിച്ചത്. മലയാള ഭാഷയ്ക്കും സാഹിത്യത്തിനും നല്‍കിയ സമഗ്ര സംഭാവന പരിഗണിച്ചാണ് പതിനായിരത്തിയൊന്ന് രൂപയും പ്രശസ്തിപത്രവും ആര്‍ടിസ്റ്റ് ബി.ഡി ദത്തന്‍ രൂപകല്പനചെയ്ത ശില്‍പവുമടങ്ങുന്ന പുരസ്‌കാരം സമ്മാനിച്ചത്.
ഏത് പുരസ്‌കാരങ്ങളേക്കാളും വലുതാണ് പുനത്തില്‍ കുഞ്ഞബ്ദുല്ലയെന്നും അദ്ദേഹത്തിന് പുരസ്‌കാരങ്ങള്‍ നല്‍കുമ്പോള്‍ അവയാണ് ആദരിക്കപ്പെടുന്നതെന്നും മുകുന്ദന്‍ അഭിപ്രായപ്പെട്ടു. എം.കെ മുനീര്‍ എം.എല്‍.എ, പുനത്തിലിന്റെ മക്കളായ നാസിമ, നവാബ്, മരുമക്കളായ ബിന്ദു, ജലീല്‍, കുടുംബസുഹൃത്ത് ടി. രാജന്‍, സി.വി കുഞ്ഞുരാമന്റെ പൗത്രന്‍ ഹാഷിം രാജ്, എ.കെ അബ്ദുല്‍ ഹക്കീം പങ്കെടുത്തു.