പരപ്പനങ്ങാടി: താനൂര്‍ റോഡില്‍ എന്‍.സി.സി റോഡിനടുത്തു പെട്രോള്‍ പമ്പിനു സമീപം സ്‌കൂട്ടറും ഓട്ടോയും കൂട്ടിയിടിച്ചു സ്‌കൂട്ടര്‍ യാത്രക്കാരനു പരുക്കേറ്റു. പരപ്പനങ്ങാടി ടൗണില്‍ നിന്നു ചിറമംഗലം ഭാഗത്തേക്കു വരികയായിരുന്ന ഓട്ടോയും ചിറമംഗലം ഭാഗത്തു നിന്നു വരികയായിരുന്ന സ്‌കൂട്ടറും തമ്മിലാണു കൂട്ടിയിടിച്ചത്. ഇന്നലെ വൈകുന്നേരം ആറരയോടെയാണ് അപകടം. പുത്തന്‍പീടികയിലെ തെക്കേ അച്ചമ്പാട്ട് ഗോപാലകൃഷ്ണന്റെ മകന്‍ വിജീഷി(24 )നാണു പരുക്ക്. വിജീഷിന്റെ കൂടെയുണ്ടായിരുന്ന അസ്ഹറുദീന്‍ പരുക്കില്ലാതെ രക്ഷപ്പെട്ടു.
ഇടിയില്‍ സ്‌കൂട്ടറിന്റെ മുന്‍ഭാഗം തകര്‍ന്നു. തലയ്ക്കും കൈക്കും പരുക്കു പറ്റിയ വിജീഷിനെ പരപ്പനങ്ങാടിയിലെ സ്വകാര്യ ആശുപത്രിയില്‍ പ്രാഥമിക ചികിത്സക്കു ശേഷം കോഴിക്കോടു മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു.