കൊച്ചി: വരാപ്പുഴയില്‍ പൊലിസ് കസ്റ്റഡിയില്‍ കൊല്ലപ്പെട്ട ശ്രീജിത്തിന്റെ ബന്ധുക്കളില്‍നിന്നു കൈക്കൂലി വാങ്ങിയ പൊലിസ് ഡ്രൈവര്‍ അറസ്റ്റില്‍. പറവൂര്‍ സി.ഐയുടെ ഡ്രൈവറായിരുന്ന പ്രദീപ്കുമാറാണ് അറസ്റ്റിലായത്. സി.ഐ ക്രിസ്പിന്‍ സാമിനെന്ന് പറഞ്ഞാണ് പ്രദീപ് കുമാര്‍ കൈക്കൂലി കൈപറ്റിയത്.

പൊലിസ് ഡ്രൈവര്‍ കൈക്കൂലി വാങ്ങിയെന്ന വിവരം കഴിഞ്ഞ മാസം 10നാണ് അന്വേഷണസംഘത്തിന് ലഭിച്ചത്. ശ്രീജിത്തിന്റെ ഭാര്യാപിതാവ് പ്രദീപില്‍ നിന്നുമാണ് ഇയാള്‍ കൈക്കൂലി വാങ്ങിയത്. സാക്ഷിമൊഴികളുടെയും അന്വേഷണത്തിന്റെയും അടിസ്ഥാനത്തില്‍ പ്രദീപ് കുമാര്‍ കൈക്കൂലി വാങ്ങിയെന്നത് സ്ഥിരീകിരിച്ചതായി അന്വേഷണസംഘം വ്യക്തമാക്കി.
ശ്രീജിത്തിന്റെ ഭാര്യ അഖിലയുടെ പിതാവ്, ഒരു ബന്ധു, ഇടനിലക്കാരനായ ഒരു ഓട്ടോറിക്ഷ ഡ്രൈവര്‍ തുടങ്ങിയവരാണ് കേസിലെ സാക്ഷികള്‍. സംഭവം പുറത്തറിഞ്ഞതിനെത്തുടര്‍ന്ന് കഴിഞ്ഞ മാസം തന്നെ ഇയാളെ അന്വേഷണവിധേയമായി സസ്‌പെന്‍ഡ് ചെയ്തിരുന്നു.
ഇടനിലക്കാരന്‍ വഴിയാണ് ഡ്രൈവര്‍ കൈക്കൂലി വാങ്ങിയത്. അറസ്റ്റിലായ ശ്രീജിത്തിന്റെ ആരോഗ്യനില തീരെ മോശമായതിനെ തുടര്‍ന്നാണ് ഇടനിലക്കാരന്‍ വഴി സി.ഐയുടെ ഡ്രൈവറെ ബന്ധപ്പെട്ടത്.
25,000 രൂപ ഇയാള്‍ ആവശ്യപ്പെട്ടപ്പോള്‍ 15,000 നല്‍കിയെന്നാണ് പ്രദീപ് അന്വേഷണ സംഘത്തോട് പറഞ്ഞത്. ഏപ്രില്‍ ഏഴിന് രാത്രിയായിരുന്നു സംഭവം. ശ്രീജിത്തിന്റെ മരണശേഷം കുറച്ച് ദിവസങ്ങള്‍ കഴിഞ്ഞപ്പോള്‍ അവര്‍ തുക തിരികെ എത്തിച്ചിരുന്നു. ഇയാളെ ആലുവ പൊലിസ് ക്ലബ്ബിലേക്ക് വിളിച്ചുവരുത്തി ചോദ്യംചെയ്യുകയും പിന്നീട് സസ്‌പെന്റ് ചെയ്യുകയുമായിരുന്നു. പൊലിസ് ഡ്രൈവര്‍ പ്രദീപ് കുമാറിനെ മൂവാറ്റുപുഴ വിജിലന്‍സ് കോടതിയില്‍ ഹാജരാക്കി.