റിയാദ്: സഊദിയിൽ രണ്ടു പുതിയ വാതക, എണ്ണ പാടങ്ങൾ കണ്ടെത്തി. സഊദി ദേശീയ എണ്ണകമ്പനിയായ സഊദി അരാംകോയാണ് ഇക്കാര്യം അറിയിച്ചത്. സഊദിയുടെ വടക്ക് പടിഞ്ഞാറു ഭാഗത്തായി ഒരു പാടത്ത് എണ്ണ ശേഖരവും വാതക ശേഖരവുമാണ് കണ്ടെത്തിയത്. ഇതിനു പുറമെ ഈ വർഷം ആദ്യ പാദത്തിൽ സെൻട്രൽ ബിസിനസ് ഡിസ്റ്റ്രിക്കിൽ ഒരു എണ്ണപ്പാടം കണ്ടെത്തിയതായും അരാംകോ അറിയിച്ചു.

    എണ്ണ, ഗ്യാസ് ശേഖരമുള്ള പാടം രാജ്യത്തിന്റെ വടക്കു പടിഞ്ഞാറു ഭാഗത്തും എണ്ണ ശേഖരമുള്ള പാടം മധ്യ സഊദിയിലുമാണ് കണ്ടെത്തിയതെന്നും കമ്പനി പ്രസ്താവനയിൽ അറിയിച്ചു. കഴിഞ്ഞ വർഷം സഊദി അരാംകോ കണ്ടെത്തിയ രണ്ടു എണ്ണപ്പാടങ്ങളിൽ എണ്ണ ശേഖരം തിരിച്ചറിയുന്നതിനുള്ള ഏഴു കിണറുകൾ ഇവിടങ്ങളിൽ വിജയകരമായി കുഴിച്ചിട്ടുണ്ട്‌. മറ്റൊരു വാതക പാടവും അഞ്ചു വാതക ശേഖരങ്ങളും കഴിഞ്ഞ വർഷം കമ്പനി കണ്ടെത്തിയിരുന്നു.