കോഴിക്കോട്: ചരിത്ര പ്രസിദ്ധമായ കോഴിക്കോട് ഇടിയങ്ങര ശൈഖ് പള്ളിയിലെ 458 ാം അപ്പവാണിഭ നേര്‍ച്ചക്ക് കൊടിയേറി. രാവിലെ ഒന്‍പതിന് മഖാം അങ്കണത്തില്‍ സമസ്ത കേരള ജംഇയ്യത്തുല്‍ ഉലമ പ്രസിഡന്റ് സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍ കൊടിയുയര്‍ത്തിയതോടെ നേര്‍ച്ചയുടെ പ്രധാന ചടങ്ങുകള്‍ക്ക് സമാരംഭം കുറിച്ചു.
തുടര്‍ന്ന് സമസ്ത വിദ്യാഭ്യാസ ബോര്‍ഡ് ജന. സെക്രട്ടറി എം.ടി അബ്ദുല്ല മുസ്‌ലിയാരുടെ അധ്യക്ഷതയില്‍ ചേര്‍ന്ന പണ്ഡിത സംഗമം സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍ ഉദ്ഘാടനം ചെയ്തു.
സമസ്ത കേന്ദ്ര മുശാവറാംഗങ്ങളായ ചേലക്കാട് മുഹമ്മദ് മുസ്‌ലിയാര്‍, വില്ല്യാപ്പള്ളി ഇബ്രാഹീം മുസ്‌ലിയാര്‍, ജാമിഅ ദാറുസ്സലാം വൈസ് പ്രിന്‍സിപ്പല്‍ ഇ.കെ അബൂബക്കര്‍ മുസ്‌ലിയാര്‍, അബ്ദുല്‍ ഗഫൂര്‍ ഹൈതമി നരിപ്പറ്റ, എം.പി തഖിയ്യുദ്ദീന്‍ ഹൈതമി, ഒളവണ്ണ അബൂബക്കര്‍ ദാരിമി, മുഹമ്മദലി ദാരിമി ശ്രീകണ്ഠപുരം, അബ്ദുറഹ്മാന്‍ ഫൈസി കുഴിമണ്ണ, മുഹമ്മദ് കുട്ടി ദാരിമി കോടങ്ങാട്, പാലത്തായി മൊയ്തു ഹാജി, മരക്കാര്‍ ഹാജി പുവ്വാട്ടുപറമ്പ്, അഹ് മദ് ഫൈസി കടലൂര്‍ സംസാരിച്ചു. ജാമിഅ ദാറുസ്സലാം ജനറല്‍ സെക്രട്ടറി എ.വി അബ്ദുറഹ്മാന്‍ മുസ്‌ലിയാര്‍ സ്വാഗതവും കെ.പി മുസ്തഫ ദാരിമി നന്ദിയും പറഞ്ഞു. ഇന്ന് സിയാറത്തും കൂട്ടപ്രാര്‍ഥനയും നടക്കും.
നാളെ രാവിലെ 11ന് ചേരുന്ന സമാപന ഖത്തം ദുആ മഹാ സംഗമത്തിന് ജാമിഅ ദാറുസ്സലാം പ്രസിഡന്റ് പാണക്കാട് സയ്യിദ് ഹൈദരലി ശിഹാബ് തങ്ങള്‍ നേതൃത്വം നല്‍കും. സമസ്ത മുശാവറ അംഗങ്ങളായ മാണിയൂര്‍ അഹ്മദ് മുസ്‌ലിയാര്‍, കെ.കെ.പി അബ്ദുല്ല മുസ്‌ലിയാര്‍, കോട്ടുമല മൊയ്തീന്‍ കുട്ടി മുസ്‌ലിയാര്‍, എം.എം മുഹ്‌യിദ്ദീന്‍ മുസ്‌ലിയാര്‍ ആലുവ, പി.എസ് ഹൈദ്രോസ് മുസ്‌ലിയാര്‍ ഏലംകുളം, മൊയ്തീന്‍ കുട്ടി ഫൈസി വാക്കോട് തുടങ്ങിയ പണ്ഡിതശ്രേഷ്ഠരും സാദാത്തുക്കളും സൂഫീവര്യന്മാരും പങ്കെടുക്കും.