തിരുവനന്തപുരം: ലോക്ക് ഡൗണ്‍ കാലത്ത് ചരക്കുനീക്കം സുഗമമാക്കുന്നതിനായി ഇന്ത്യന്‍ റെയില്‍വേ ആരംഭിച്ച പ്രതിദിന പാര്‍സല്‍ ട്രെയിന്‍ സര്‍വിസുകള്‍ക്ക് നൂറില്‍ നൂറു മാര്‍ക്ക്. നൂറിലധികം പ്രതിദിന പാര്‍സല്‍ സര്‍വിസുകളാണ് തിരുവനന്തപുരം റെയില്‍വേ ഡിവിഷന്‍ ഇതുവരെ പൂര്‍ത്തിയാക്കിയത്. ഒരു ലക്ഷം കിലോഗ്രാമിലധികം സാധനസാമഗ്രികള്‍ ലക്ഷ്യസ്ഥാനത്തെത്തിച്ചു. 

തിരുവനന്തപുരം ഡിവിഷനില്‍ ഏപ്രില്‍ ഒന്‍പതിനാണ് പരീക്ഷണാര്‍ഥം പ്രതിദിന പാര്‍സല്‍ സര്‍വിസ് ട്രെയിനുകള്‍ ഓടിത്തുടങ്ങിയത്. തുടക്കത്തില്‍ ആറു ദിവസത്തേക്കു മാത്രമായിരുന്നു സര്‍വിസുകള്‍ നിശ്ചയിച്ചതെങ്കിലും ലോക്ക് ഡൗണ്‍ നീട്ടിയതോടെ സര്‍വിസുകളും നീട്ടുകയായിരുന്നു. കാര്‍ഷിക വിളകളും പച്ചക്കറിയും പച്ചമീനും ഉള്‍പ്പെടെ ചുരുങ്ങിയ ചെലവില്‍ കൊണ്ടുപോകാന്‍ കഴിയുന്ന പാര്‍സല്‍ ബുക്കിങ്ങുകള്‍ക്ക് മികച്ച പ്രതികരണമാണ് പൊതുജനങ്ങളില്‍ നിന്നുണ്ടായത്.

ഏപ്രില്‍ ഒന്‍പതിന് രണ്ടു പ്രത്യേക പ്രതിദിന പാര്‍സല്‍ ട്രെയിന്‍ സര്‍വിസുകളാണ് തിരുവനന്തപുരം റെയില്‍വേ ഡിവിഷന്‍ ആരംഭിച്ചത്. തുടര്‍ന്ന് ഓഖയ്ക്കും തിരുവനന്തപുരത്തിനുമിടയ്ക്ക് മൂന്നു പ്രത്യക സര്‍വിസുകളും നടത്തി. ലോക്ക് ഡൗണില്‍ കാര്‍ഷിക വിളകള്‍ ചുരുങ്ങിയ ചെലവില്‍ വിപണിയിലെത്തിക്കാമെന്നതിനാല്‍ കര്‍ഷകരാണ് ഇടപാടുകാരില്‍ കൂടുതലും. 

പ്രതിദിനം ബുക്കിങ്ങുകള്‍ വര്‍ധിച്ചതിന്റെ പശ്ചാത്തലത്തിലും ഉപഭോക്താക്കള്‍ക്കു സേവനങ്ങള്‍ മെച്ചപ്പെടുത്തുന്നതിന്റെ ഭാഗമായും പാര്‍സല്‍ സേവനങ്ങള്‍ വീട്ടുപടിക്കലെത്തിക്കുകയാണ് റെയില്‍വേ ഇപ്പോള്‍. തപാല്‍ വകുപ്പുമായി കൈകോര്‍ത്താണ് റെയില്‍വേ വീട്ടുപടിക്കല്‍ പാര്‍സല്‍ സേവനമെത്തിക്കുന്നത്. ബുക്ക് ചെയ്യുന്നവരുടെ വീടുകളെത്തി പാര്‍സല്‍ സ്വീകരിക്കാനും ലഭിക്കേണ്ട ആളുകളുടെ വീടുകളിലെത്തി വിതരണം ചെയ്യാനും തപാല്‍ വകുപ്പിന്റെ സേവനം പ്രയോജനപ്പെടുത്തുകയാണ്. 

ഇതിനായി റെയില്‍വേ തിരുവനന്തപുരം ഡിവിഷനും തപാല്‍ വകുപ്പ് കേരള സര്‍ക്കിളും ധാരണാപത്രം ഒപ്പുവച്ചു. ഇതുപ്രകാരം തപാല്‍ ഉദ്യോഗസ്ഥര്‍ പാര്‍സല്‍ ഉപഭോക്താവിന്റെ സ്ഥലത്തു നിന്ന് ശേഖരിച്ച് അവ ബുക്ക് ചെയ്യും. തിരുവനന്തപുരം, കൊല്ലം, കോട്ടയം, എറണാകുളം, ആലുവ, തൃശൂര്‍ എന്നിവിടങ്ങളിലാണ് ആദ്യഘട്ടത്തില്‍ ഈ സേവനമുണ്ടാവുക. നിലവിലുള്ള പ്രതിദിന പാര്‍സല്‍ സര്‍വിസുകള്‍ ഈ മാസം 31 വരെ ദീര്‍ഘിപ്പിക്കാനും റെയില്‍വേ തീരുമാനിച്ചിട്ടുണ്ട്.