അരീക്കോട്: മലപ്പുറം ലോക്‌സഭ ഉപ തെരഞ്ഞെടുപ്പ് പ്രചാരണത്തിന്റെ ഭാഗമായി ഇടതുമുന്നണി പുറത്തിറക്കിയ പ്രസിദ്ധീകരണത്തില്‍ തനിക്കെതിരെ അപകീര്‍ത്തികരമായ ലേഖനം ഉള്‍പ്പെടുത്തിയെന്നാരോപിച്ച് പി.കെ ബഷീര്‍ എം.എല്‍.എ ജില്ലാ വരണാധികാരി കൂടിയായ ജില്ലാ കലക്ടര്‍ അമിത് മീണയ്ക്ക് പരാതി നല്‍കി.
ഇടതു മുന്നണി പുറത്തിറക്കിയ ദിശ എന്ന പ്രസിദ്ധീകരണത്തിലാണ് പി.കെ ബഷീറിനെതിരെ അപകീര്‍ത്തികരമായ ലേഖനമുള്ളത്.
പ്രസിദ്ധീകരണത്തിന്റെ നാലാം പേജില്‍ ബഷീറിന്റെ ഭീഷണി പ്രസംഗങ്ങള്‍ എന്ന പേരിലാണ് ലേഖനം അച്ചടിച്ചുവന്നിരിക്കുന്നത്. ലേഖനത്തില്‍ പ്രസിദ്ധീകരിച്ച വിഷയം കോടതി പരിഗണിച്ചതാണ്. പ്രസിദ്ധീകരിച്ച ലേഖനം തികച്ചും അവാസ്തവവും ദുരുദ്ദേശപരവും കെട്ടിച്ചമച്ചതുമാണെന്ന് അദ്ദേഹം കലക്ടര്‍ക്ക് നല്‍കിയ പരാതിയില്‍ പറയുന്നു.