ന്യൂഡല്‍ഹി: ഗുരുതരമായി പരുക്കേറ്റ കുട്ടിയെ മുളയും കട്ടിലും ഉപയോഗിച്ച് കെട്ടിയുണ്ടായ സ്ട്രച്ചറില്‍ ചുമന്ന് തൊഴിലാളി കുടുംബത്തിന്റെ യാത്ര. ലുധിയാനയില്‍ നിന്ന് മധ്യപ്രദേശിലെ സിന്‍ഗ്രൗളിയിലേക്ക് 1300 കിലോ മീറ്റര്‍ സഞ്ചരിക്കുന്ന ഇവര്‍ക്കാവട്ടേ ആവശ്യത്തിന് ഭക്ഷണമോ ധരിക്കാന്‍ ചെരുപ്പോ ഇല്ല.

ഉത്തര്‍പ്രദേശിലെ കാണ്‍പൂരില്‍ എത്തിയപ്പോഴാണ് അവര്‍ക്കൊരു സഹായം ലഭിച്ചത്. അപ്പോഴേക്കും അവര്‍ 800 കിലോ മീറ്റര്‍ പിന്നിട്ടിരുന്നു. തുടര്‍ന്ന് സഞ്ചരിക്കാന്‍ പൊലിസ് ഇവര്‍ക്ക് ട്രക്ക് ഏര്‍പ്പാടാക്കി നല്‍കി.

#MigrantLivesMatter | Family of #MigrantWorker has been walking for last 15 days with an injured child. They started from Ludhiana and reached Kanpur today. Policemen spotted the family and helped them get a truck for the rest of the journey to Madhya Pradesh pic.twitter.com/C2RAXUvw8j

— NDTV (@ndtv) May 15, 2020

ലോക്ക്ഡൗണ്‍ കാരണം കുടുങ്ങിക്കിടന്ന ആയിരങ്ങളാണ് രാജ്യത്തിന്റെ വിവിധ ഭാഗങ്ങളില്‍ തലങ്ങും വിലങ്ങും നടന്നുപോകുന്നത്. അതിനിടയില്‍ നിരവധി അപകട വാര്‍ത്തകളുമെത്തുന്നു. ഉത്തര്‍പ്രദേശില്‍ കുടിയേറ്റ തൊഴിലാളികള്‍ സഞ്ചരിച്ച ലോറി മറിഞ്ഞ് 24 പേരാണ് ഇന്ന് മരിച്ചത്. 30 പേര്‍ക്ക് പരുക്കേല്‍ക്കുകയും ചെയ്തു.

ലുധിയാനയില്‍ നിന്ന് 15 ദിവസം മുന്‍പാണ് ഈ കുടുംബം നടത്തം ആരംഭിച്ചത്. അവിടെ ദിവസക്കൂലിക്കാരായിരുന്നു ഇവര്‍. കുട്ടിക്ക് എന്തു പറ്റിയെന്ന ചോദ്യത്തിന്, കഴുത്ത് തകര്‍ന്നിരിക്കുകയാണെന്ന മറുപടി. ചെറിയ കുട്ടികള്‍ അടക്കമുള്ള കുടുംബത്തിന് ആവശ്യത്തിന് കഴിക്കാന്‍ പോലും ഭക്ഷണമില്ല. 'ആരും വയറുനിറച്ച് കഴിച്ചിട്ടില്ല'- ഒരാള്‍ പറഞ്ഞു.