പഴയങ്ങാടി: വെങ്ങരയില്‍ ബി.ജെ.     പി അനുഭാവികളുടെ വീടിനു നേരെ അക്രമം. വെങ്ങര വേട്ടയ്‌ക്കൊരുമകന്‍ ക്ഷേത്രത്തിനു സമീപം വടക്കെ പുരയില്‍ ബാബുവിന്റെ വീടിനു നേരെയാണ് ഇന്നലെ പുലര്‍ച്ചെ 1.45ഓടെ ബോംബെറിഞ്ഞത്. വീടിനോടു ചേര്‍ന്ന കിണര്‍ ഭിത്തിയില്‍ തട്ടി ഉഗ്രശബ്ദത്തോടെ ബോംബ് പൊട്ടി. റബറിന്റെ ബക്കറ്റും പ്ലാസ്റ്റിക്ക് കപ്പും തകര്‍ന്നു.
ബാബു ശബ്ദം കേട്ട് പുറത്തിറങ്ങിയപ്പോള്‍ ഇരുചക്രവാഹനത്തിന്റെ ശബ്ദം കേട്ടതായി പറയുന്നു. പഴയങ്ങാടി എസ്.ഐ പി.ബി സജിവും സംഘവും സ്ഥലത്തെത്തി പരിശോധന നടത്തി. സമീപത്ത് നിന്ന് ബോംബിന്റെ അവശിഷ്ടങ്ങള്‍ കണ്ടെത്തി. സംഭവത്തില്‍ ബി.ജെ.പി പ്രതിഷേധിച്ചു.
ബാബുവിന്റെ മക്കള്‍ പി. രാഹുല്‍, അഭിഷേക് എന്നിവര്‍ ബി.ജെ.പി അനുഭാവികളാണ്. കഴിഞ്ഞ ദിവസം വെങ്ങരയില്‍ തന്നെ ബി.ജെ.പിയുടെ സ്തൂപവും കൊടിമരവും തകര്‍ത്തിരുന്നു.