തിരുവനന്തപുരം: രാജ്യാന്തര മോഷണക്കേസുകളില്‍ പ്രതിയായ ഡല്‍ഹി സ്വദേശി ബണ്ടിചോര്‍ എന്നറിയപ്പെടുന്ന ദേവീന്ദര്‍സിങ് (44) കുറ്റക്കാരനെന്ന് തിരുവനന്തപുരം അഡീഷണല്‍ സെഷന്‍സ് കോടതി കണ്ടെത്തി. ഭവനഭേദനം, മോഷണം, തെളിവുനശിപ്പിക്കല്‍ എന്നിങ്ങനെ ഇയാള്‍ക്കെതിരേയുള്ള കുറ്റങ്ങള്‍ തെളിഞ്ഞു. ഏപ്രില്‍ 22നു ശിക്ഷ വിധിക്കും. വിദേശ മലയാളിയായ പ്ലാമൂട് കെ. വേണുഗോപാലന്‍നായരുടെ പട്ടം മരപ്പാലത്തെ വീട്ടില്‍ നടത്തിയ വന്‍ കവര്‍ച്ചയെത്തുടര്‍ന്നാണ് ബണ്ടിചോര്‍ പിടിയിലായത്. 2013 ജനുവരി 21നായിരുന്നു സംഭവം.
വേണുഗോപാലന്‍നായരുടെ വീട്ടില്‍ നിന്ന് ലാന്‍സര്‍ കാറും സ്വര്‍ണവും മൊബൈല്‍ ഫോണും ഡി.വി.ഡി പ്ലയറുമുള്‍പ്പെടെ മുപ്പതുലക്ഷം രൂപ വിലവരുന്ന വസ്തുക്കളുമായാണ് ബണ്ടിചോര്‍ കടന്നത്. തിരുവനന്തപുരം നന്തന്‍കോട് റോഡരികില്‍ പാര്‍ക്ക് ചെയ്തിരുന്ന വിമല്‍കുമാറിന്റെ കാര്‍ മോഷ്ടിച്ച ബണ്ടിചോര്‍ ഈ കാറിലെത്തിയാണ് പട്ടത്തു കവര്‍ച്ച നടത്തിയത്. പിന്നീട് കവര്‍ച്ചയ്ക്ക് ശേഷം വീട്ടിലെ കാറുമായി കടക്കുകയായിരുന്നു. സി.സി ടിവി ദൃശ്യങ്ങളിലൂടെയാണ് പ്രതിയെ തിരിച്ചറിഞ്ഞത്.
പൊലിസ് പുറകെയുണ്ടെന്നു മനസിലാക്കിയ ഇയാള്‍ കാര്‍ തമിഴ്‌നാട്ടിലെ കൃഷ്ണഗിരിയില്‍ ഉപേക്ഷിച്ചു കടന്നുകളയുകയായിരുന്നു. ഒടുവില്‍ പൂനെയില്‍ നിന്നാണ് ബണ്ടിചോറിനെ പൊലിസ് പിടികൂടിയത്. നാലു വര്‍ഷമായി തടവില്‍ കഴിയുകയാണിയാള്‍. പലതവണ ജാമ്യത്തിന് ശ്രമിച്ചെങ്കിലും ലഭിച്ചില്ല. ഇടയ്ക്കു മാനസികവിഭ്രാന്തി കാണിച്ചതിനെ തുടര്‍ന്ന് ഇയാളെ മാനസികാരോഗ്യ കേന്ദ്രത്തില്‍ പ്രവേശിപ്പിച്ചെങ്കിലും രോഗമില്ലെന്നു കണ്ടെത്തിയതിനെത്തുടര്‍ന്ന് തിരികെ ജയിലിലേക്ക് അയച്ചു. രാജ്യാന്തര കുറ്റവാളിയായ ബണ്ടിചോര്‍ മുന്നൂറോളം കവര്‍ച്ചാകേസുകളിലെ പ്രതിയാണ്. ഡല്‍ഹി, ചെന്നൈ, ബംഗളൂരു എന്നീ നഗരങ്ങളില്‍ ഇയാള്‍ നിരവധി മോഷണങ്ങള്‍ നടത്തിയിട്ടുണ്ട്. ആഡംബരവസ്തുക്കളാണ് കൂടുതലായും മോഷ്ടിച്ചിരുന്നത്.
ഡല്‍ഹി, ചെന്നൈ, ചണ്ഡിഗഢ് എന്നിവിടങ്ങളില്‍ കേസുകളുള്ള ബണ്ടിചോറിനെ പൊലിസ് പല പ്രാവശ്യം അറസ്റ്റ് ചെയ്യാന്‍ ശ്രമിച്ചെങ്കിലും തന്ത്രപൂര്‍വം രക്ഷപ്പെടുകയായിരുന്നു. ഒടുവില്‍ പിടിവീണത് കേരളത്തിലെ കവര്‍ച്ചയിലും. ഹൈടെക്ക് കവര്‍ച്ചകളിലൂടെ കുപ്രസിദ്ധനായ ബണ്ടിചോറിന്റെ വേറിട്ട മോഷണ ശൈലി സിനിമയ്ക്കും വിഷയമായിരുന്നു. 2016 നവംബര്‍ 16നാണ് കേസിന്റെ വിചാരണ തുടങ്ങിയത്. ബി.എ ആളൂരാണ് ബണ്ടി ചോറിനുവേണ്ടി ഹാജരായത്. കന്റോണ്‍മെന്റ് പൊലിസ് ചാര്‍ജ് ചെയ്ത കേസില്‍ അഡ്വ. റെക്‌സ് പ്രോസിക്യൂഷന് വേണ്ടി ഹാജരായി. സ്ഥിരം കുറ്റവാളിയായതിനാല്‍ പരമാവധി ശിക്ഷ വിധിക്കണമെന്നും പ്രോസിക്യൂഷന്‍ ആവശ്യപ്പെട്ടു.