ആറ്റിങ്ങല്‍: അടച്ച ഓടയില്‍ കെട്ടിനിന്നവെള്ളം കരകവിഞ്ഞൊഴുകി വലിയകുന്നില്‍ നാശനഷ്ടം വരുത്തിയ സംഭവം വാട്ടര്‍ അതോറിറ്റിയുടെ തലയില്‍ കെട്ടിവച്ചു പോളിടെക്‌നിക് പ്രിന്‍സിപ്പല്‍ തലയൂരിയതില്‍ പ്രതിഷേധം ശക്തമാകുന്നു. വര്‍ഷങ്ങളായി വാട്ടര്‍ അതോറിറ്റിയുടെ ജലസംഭരണി വൃത്തിയാക്കുമ്പോള്‍ മലിനജലം തിരികെ നദിയിലേക്ക് ഒഴുകിയെത്താനായി അതോറിറ്റി നിര്‍മിച്ച കോണ്‍ക്രീറ്റ് ഓട ആറ്റിങ്ങല്‍ ഗവണ്മെന്റ് പോളിടെക്‌നിക് വളപ്പിനുസമീപത്തുകൂടിയാണ് കടന്നുപോകുന്നത്. ഇക്കാലമത്രയും പോളിടെക്‌നിക്കില്‍ പ്രിന്‍സിപ്പല്‍മാരായി വന്നവര്‍ എല്ലാം ഓട അടക്കാന്‍ ശ്രമങ്ങള്‍ നടത്തി പിന്‍മാറി. പ്രദേശത്തുള്ളവര്‍ ഓട അടച്ചാല്‍ സംഭവിക്കുന്നത് അവരെ ബോധ്യപ്പെടുത്തി. പുതുതായി കൊല്ലം സ്വദേശിയായ പ്രിന്‍സിപ്പല്‍ എത്തിച്ചേര്‍ന്നു വാട്ടര്‍ അതോറിറ്റിയുടെ ഓട കൈയ്യേറി മതില്‍ കെട്ടുകയും ഓടയില്‍ രണ്ടിടത്തായി ഇരുമ്പുകമ്പികളില്‍ വലകള്‍ സ്ഥാപിക്കുകയും ചെയ്തു. ഈ സമയത്തും നാട്ടുകാര്‍ ഇടപെട്ടുവെങ്കിലും അവയൊന്നും ചെവികൊള്ളാതെ മതില്‍ കെട്ടിയടക്കുകയായിരുന്നുവത്രേ.
കഴിഞ്ഞ ദിവസം രാത്രിയില്‍ ജലസംഭരണി വൃത്തിയാക്കിയ മലിനജലം ജലവകുപ്പ് പതിവുപോലെ ഓടയില്‍ ഒഴുക്കിവിട്ടു. ഓടയില്‍ പ്രിന്‍സിപ്പല്‍ സ്ഥാപിച്ച ഇരുമ്പു വലയില്‍ സമീപത്തെ മരങ്ങളില്‍ നിന്നുള്ള ഇലകളും മറ്റുചവറുകളും വീണ് ഓടയില്‍ ഒഴുക്ക് നിലച്ചിരുന്നു. കഴിഞ്ഞ മഴയില്‍ ഓടയില്‍ മലിനജലം കെട്ടിനില്‍ക്കുന്ന വിവരം പരിസരവാസി പ്രിന്‍സിപ്പലിനെ ബോധ്യപെടുത്തിയിട്ടും ചെവികൊണ്ടില്ല. കഴിഞ്ഞ ദിവസം ജലസംഭരണിയില്‍ നിന്നുള്ള മലിനജലം ഓടയില്‍ കെട്ടിനിന്ന് സമ്മര്‍ദ്ദം ഏറിയപ്പോള്‍ കരകവിഞ്ഞൊഴുകി സമീപത്തെ വീടുകളുടെ ചുറ്റുമതില്‍ തകര്‍ത്തു നാശനഷ്ടങ്ങളുണ്ടായി.
എന്നാല്‍ സംഭവം വാട്ടര്‍ അതോറിറ്റിയിലെ ജീവനക്കാര്‍ പമ്പ് ഓഫാക്കാന്‍ മറന്നതിനാലാണ് ഉണ്ടായതെന്ന് പ്രിന്‍സിപ്പല്‍ വരുത്തി തീര്‍ക്കുകയായിരുന്നുവത്രേ. സമഗ്രമായ അന്വേഷണം വേണമെന്നാണ് നാട്ടുകാരുടെ ആവശ്യം. നിലവില്‍ ചെയ്യാത്ത കുറ്റത്തിനാണ് പഴി കേട്ടതെന്ന് വാട്ടര്‍ അതോറിറ്റി ജീവനക്കാര്‍ പറയുന്നു.