ഗയാന: വെസ്റ്റിന്‍ഡീസിനെതിരായ ഏകദിന ക്രിക്കറ്റ് പരമ്പര പാകിസ്താന്‍ സ്വന്തമാക്കി. മൂന്നാമത്തെയും അവസാനത്തെയും മത്സരത്തില്‍ ആറുവിക്കറ്റിന് ജയിച്ചാണ് പാകിസ്താന്‍ പരമ്പര 2-1ന് സ്വന്തമാക്കിയത്. ടോസ് നേടി വിന്‍ഡീസ് ബാറ്റിങ് തെരഞ്ഞെടുത്ത വിന്‍ഡീസ് നിശ്ചിത 50 ഓവറില്‍ ഒന്‍പതു വിക്കറ്റിന് 233 റണ്‍സാണെടുത്തത്. പാകിസ്താന്‍ 41 പന്തു ശേഷിക്കെ നാലു വിക്കറ്റ് നഷ്ടത്തില്‍ ഇത് മറികടക്കുകയായിരുന്നു. നേരത്തെ ഷെയ് ഹോപ്(71) ജേസന്‍ മുഹമ്മദ്(59) എന്നിവരുടെ അര്‍ധസെഞ്ച്വറികളുടെ ബലത്തിലാണ് വിന്‍ഡീസ് പൊരുതാവുന്ന സ്‌കോര്‍ സ്വന്തമാക്കിയത്. പാകിസ്താന് വേണ്ടി മുഹമ്മദ് ആമിര്‍ ആമിര്‍, ജുനൈദ് ഖാന്‍, ഷദാബ് ഖാന്‍ എന്നിവര്‍ രണ്ടു വിക്കറ്റെടുത്തു.
മറുപടി ബാറ്റിങില്‍ ഷോയിബ് മാലിക്(101*) മുഹമ്മദ് ഹഫീസ്(84) എന്നിവരുടെ മികവില്‍ അനായാസ ജയം നേടുകയായിരുന്നു പാകിസ്താന്‍. ഒരു ഘട്ടത്തില്‍ മൂന്നിന് 36 എന്ന നിലയില്‍ സമ്മര്‍ദത്തിലായെങ്കിലും ഹഫീസും മാലിക്കും ടീമിനെ മുന്നോട്ടു നയിക്കുകയായിരുന്നു.