ന്യൂഡല്‍ഹി: ജനപ്രതിനിധികള്‍ക്കെതിരായ കേസുകളെ രാഷ്ട്രീയമായും നിയമപരമായും നേരിടുമെന്ന് പ്രതിപക്ഷനേതാവ് രമേശ് ചെന്നിത്തല. കേന്ദ്രത്തില്‍ എന്‍.ഡി.എയും കേരളത്തില്‍ ഇടതുമുന്നണിയും കോണ്‍ഗ്രസ് നേതാക്കളെ രാഷ്ട്രീയമായി വേട്ടയാടുകയാണെന്നും കോണ്‍ഗ്രസ് മതേതര നിലപാടുകളില്‍ ഉറച്ചുനിന്നുകൊണ്ട് തെരഞ്ഞെടുപ്പിനെ നേരിടുമെന്നും അദ്ദേഹം പറഞ്ഞു.
ഇടതുമുന്നണി പരിഭ്രമിച്ചിരിക്കുകയാണ്. ലോക്‌സഭാ തെരഞ്ഞെടുപ്പിനുള്ള സാധ്യതാ പട്ടികയില്‍ പേരു വന്നപ്പോഴാണ് എം.എല്‍.എമാര്‍ക്കെതിരേ കേസെടുത്തിരിക്കുന്നത്. തിടുക്കത്തിലുള്ള നടപടി മുഖ്യമന്ത്രി നടത്തിയ ഗൂഢാലോചന വെളിവാക്കുന്നതാണ്. മതേതര നിലപാടില്‍ ഉറച്ച് യു.ഡി.എഫ് മുന്നോട്ടുപോകും. തിരുവനന്തപുരത്ത് രണ്ടോ മൂന്നോ പേര്‍ കൂടി ഇരുന്ന് സ്ഥാനാര്‍ഥികളെ തീരുമാനിക്കാന്‍ കോണ്‍ഗ്രസ് സി.പി.എമ്മിനെപ്പോലെ പ്രാദേശിക പാര്‍ട്ടിയല്ല. ലോക്‌സഭാ തെരഞ്ഞെടുപ്പില്‍ കോണ്‍ഗ്രസിന് അനുകൂലമായ രാഷ്ട്രീയ സാഹചര്യമാണ്.
ശനിയാഴ്ച വൈകുന്നേരം കോണ്‍ഗ്രസ് സ്ഥാനാര്‍ഥികളെ പ്രഖ്യാപിക്കും. സി.പി.എം നേരത്തെ സ്ഥാനാര്‍ഥികളെ പ്രഖ്യാപിച്ച് വെയില്‍ കൊള്ളിക്കുന്നു. കോണ്‍ഗ്രസ് ജനങ്ങള്‍ക്കു മുന്നില്‍ അവതരിപ്പിക്കുന്നത് ഏറ്റവും മികച്ച സ്ഥാനാര്‍ഥിപ്പട്ടിക ആയിരിക്കും. മാധ്യമങ്ങള്‍ ജനങ്ങളെ തെറ്റിദ്ധരിപ്പിക്കുന്ന വാര്‍ത്ത കൊടുക്കരുത്. ബംഗാളില്‍ സി.പി.എം ഓഫിസുകള്‍ ബി.ജെ.പിക്കു വിട്ടുകൊടുക്കുന്നു. സി.പി.എം ചാനലായ പീപ്പിള്‍ ടി.വി സര്‍വേ നടത്തിയാലും ഫലം കേരളത്തില്‍ യു.ഡി.എഫിന് അനുകൂലമായിരിക്കുമെന്നും അദ്ദേഹം പറഞ്ഞു.