ന്യൂഡല്‍ഹി: ഡല്‍ഹി ന്യൂനപക്ഷ കമ്മിഷന്‍ ചെയര്‍മാന്‍ സഫറുല്‍ ഇസ്‌ലാംഖാനെ തല്‍സ്ഥാനത്തു നിന്ന് നീക്കം ചെയ്യുന്നതുമായി ബന്ധപ്പെട്ട നടപടികള്‍ രണ്ടാഴ്ചയ്ക്കുള്ളില്‍ പൂര്‍ത്തിയാക്കാന്‍ ഡല്‍ഹി സര്‍ക്കാരിന് ഡല്‍ഹി ഹൈക്കോടതി നിര്‍ദേശം നല്‍കി. ഇതു സംബന്ധിച്ച് ഡല്‍ഹി ന്യൂനപക്ഷ കമ്മിഷനും സഫറുല്‍ ഇസ്‌ലാംഖാനും നോട്ടീസയയ്ക്കാനും ജസ്റ്റിസുമാരായ മന്‍മോഹന്‍, സജ്ഞീവ് നാറുല്ല എന്നിവരടങ്ങിയ ബെഞ്ച് ഉത്തരവിട്ടു.
പദവിക്കു നിരക്കാത്ത പെരുമാറ്റത്തിന്റെ പേരില്‍ ചെയര്‍മാനെയോ അംഗത്തെയോ തല്‍സ്ഥാനത്തു നിന്ന് പുറത്താക്കാനുള്ള ഡല്‍ഹി ന്യൂനപക്ഷ കമ്മിഷന്‍ നിയമത്തിലെ 4(4)(എഫ്) വകുപ്പു പ്രകാരമാണ് സഫറുല്‍ ഇസ്‌ലാം ഖാനെതിരേ ഡല്‍ഹി സര്‍ക്കാര്‍ നടപടി സ്വീകരിച്ചിരിക്കുന്നത്. ജൂലൈ 14നാണ് ന്യൂനപക്ഷ കമ്മീഷന്‍ ചെയര്‍മാന്‍ പദവിയില്‍ അദ്ദേഹത്തിന്റെ കാലാവധി തീരുക.
സഫറുല്‍ ഇസ്‌ലാം ഖാനെ പുറത്താക്കാനുള്ള നടപടികള്‍ സ്വീകരിക്കാന്‍ ഡല്‍ഹി ലഫ്റ്റനന്റ് ഗവര്‍ണര്‍ നിര്‍ദേശം നല്‍കിയതായി ഡല്‍ഹി സര്‍ക്കാര്‍ ഇന്നലെ ഹൈക്കോടതിയെ അറിയിച്ചു. ഇന്ത്യയില്‍ നടക്കുന്ന ന്യൂനപക്ഷ പീഡനങ്ങള്‍ക്കെതിരേ ഇന്ത്യന്‍ മുസ്‌ലിംകള്‍ക്ക് പിന്തുണ പ്രഖ്യാപിച്ച കുവൈത്തിനു നന്ദി പറഞ്ഞ് ഫേസ്ബുക്കില്‍ പോസ്റ്റിട്ടതിനാണ് സഫറുല്‍ ഇസ്‌ലാംഖാനെ പദവിയില്‍ നിന്ന് നീക്കം ചെയ്യാനുള്ള നടപടികള്‍ സര്‍ക്കാര്‍ ആരംഭിച്ചത്. അദ്ദേഹത്തിനെതിരേ പൊലിസ് കേസ് രജിസ്റ്റര്‍ ചെയ്യുകയുമുണ്ടായി. ഫേസ്ബുക്ക് പോസ്റ്റ് സാമുദായിക വിദ്വേഷമുണ്ടാക്കുന്നതാണെന്ന് പ്രഥമദൃഷ്ട്യാ വ്യക്തമാണെന്ന നിലപാടാണ് ഡല്‍ഹി ലഫ്റ്റനന്റ് ഗവര്‍ണര്‍ സ്വീകരിച്ചിരിക്കുന്നതെന്നും ഇക്കാര്യം ഡല്‍ഹി സര്‍ക്കാരിനെ ഗവര്‍ണര്‍ അറിയിച്ചതായും ഡല്‍ഹി സര്‍ക്കാര്‍ കോടതിയില്‍ പറഞ്ഞു.