തിരുവനന്തപുരം: ജി.എസ്.ടിയ്ക്കു മേല്‍ സെസ് ഏര്‍പ്പെടുത്താനുള്ള സാഹചര്യമല്ല രാജ്യത്തുള്ളതെന്ന് ധനമന്ത്രി തോമസ് ഐസക്. നികുതി വര്‍ധിപ്പിച്ചാല്‍ ജനങ്ങളുടെ മേലുള്ള ഭാരം വര്‍ധിപ്പിക്കും. ജി.എസ്.ടി. വരുമാനം കുറഞ്ഞുവരുന്ന ഘട്ടത്തില്‍ ഇവര്‍ ആഗ്രഹിക്കുന്ന വരുമാനം സെസില്‍നിന്ന് കിട്ടാന്‍ പോകുന്നില്ലെന്നും അദ്ദേഹം പറഞ്ഞു.

ജി.എസ്.ടിയ്ക്കു മേല്‍ സെസ് ഏര്‍പ്പെടുത്തുന്നത് സംബന്ധിച്ച് നേരത്തെയും ജി.എസ്.ടി കൗണ്‍സില്‍ ചര്‍ച്ച നടത്തിയിരുന്നു. അന്ന് സംസ്ഥാനങ്ങളെല്ലാം എതിര്‍ത്തു. പ്രളയസെസുമായി ഇതിനെ താരതമ്യപ്പെടുത്തരുത്. ഇത് ജനങ്ങളുടെ മേല്‍ അധികഭാരം അടിച്ചേല്‍പ്പിക്കലാണ്. അധികനികുതി വരുമാനം ഉണ്ടാകുമെന്ന് പറയാനാകില്ല.

റിസര്‍വ് ബാങ്കില്‍ നിന്ന് പണമെടുത്ത് കൂടുതല്‍ സംസ്ഥാനങ്ങള്‍ക്ക് നല്‍കുക എന്നതാണ് കേന്ദ്രത്തിന് ചെയ്യാനാക്കുക. സെസ് ഏര്‍പ്പെടുത്തല്‍ തീരുമാനം നടപ്പാകാനിടയില്ലെന്നും സംസ്ഥാനങ്ങളുടെ ഭൂരിപക്ഷം അതിന് ലഭിക്കില്ലെന്നും മന്ത്രി പറഞ്ഞു.