ആലപ്പുഴ: കേന്ദ്രാവിഷ്‌കൃത പദ്ധതികളുടെ ത്രൈമാസ അവലോകനത്തിനായുള്ള ദിഷയോഗങ്ങളില്‍ ബന്ധപ്പെട്ട വകുപ്പുകളുടെ ജില്ലയിലെ തലവന്മാര്‍ പങ്കെടുക്കണമെന്ന് ദിഷ ചെയര്‍മാനായ കൊടിക്കുന്നില്‍ സുരേഷ് എം.പി നിര്‍ദ്ദേശിച്ചു. പലയോഗങ്ങളിലും പദ്ധതി സംബന്ധിച്ച പൂര്‍ണവിവരം ലഭിക്കാത്ത താഴെ തലങ്ങളിലെ ഓഫിസര്‍മാരെ അയക്കുന്നത് ഗൗരവമായി കാണും. പല പദ്ധതികളും നേരിടുന്ന കാലതാമസത്തിന് ഇതൊരു കാരണമാണെന്നും അദ്ദേഹം ചുണ്ടിക്കാട്ടി.
ജലഅതോരിറ്റി നടപ്പാക്കിവരുന്ന പല പദ്ധതികളുടെയും ശരിയായ പുരോഗതി അവലോകനം സമതിക്ക് ലഭിക്കുന്നില്ല. പട്ടികജാതിക്കാര്‍ക്കായുള്ള പ്രത്യേക ഘടകപദ്ധതി പ്രകാരം ഏറ്റെടുത്ത 12 പദ്ധതികള്‍ എവിടെയെത്തിയെന്നുപോലും റിപ്പോര്‍ട്ട് ചെയ്യുന്നില്ല. കഴിഞ്ഞ ത്രൈമാസത്തെ റിപ്പോര്‍ട്ടു തന്നെ വീണ്ടും നല്‍കി ഇവര്‍ ഈ ജനവിഭാഗത്തെ തന്നെ അവഗണിക്കുകയാണെന്നും അദ്ദേഹം പറഞ്ഞു. ആലപ്പുഴ, കുട്ടനാട് ഡിവിഷനുകളിലായി എ.ആര്‍.ഡബ്‌ളിയു.എസ്.എസ് പദ്ധതികളെ കുറിച്ച് സമഗ്രമായ അവലോകനത്തിന് ജില്ല കളക്ടറുടെ അധ്യക്ഷതയില്‍ യോഗം വിളിക്കുമെന്ന് അദ്ദേഹം പറഞ്ഞു.
ജില്ലയില്‍ ആകെയുള്ള 2150 അങ്കണവാടികളില്‍ സ്വന്തമായി കെട്ടിടമില്ലാത്ത 1006 അങ്കണവാടികള്‍ക്ക് സ്വന്തമായി ഭൂമി കണ്ടെത്താനുള്ള ശ്രമം നടക്കുകയാണെന്ന് ഐ.സി.ഡി.എസ് ഓഫിസര്‍ അറിയിച്ചു. ഇതില്‍ 55 അങ്കണവാടികളുടെ കെട്ടിടനിര്‍മാണം നടന്നുവരുന്നു. അഞ്ചെണ്ണത്തിന്റെ നിര്‍മാണം ഇതിനകം പൂര്‍ത്തിയായി. നാലെണ്ണത്തിന്റെ പണി മുടങ്ങിയിട്ടുണ്ട്.
21 അങ്കണവാടികളുടെ നിര്‍മാണം പുരോഗമിക്കുന്നതായും ഓഫീസര്‍ അറിയിച്ചു.സ്വന്തമായി സ്ഥലമുള്ള 44 അങ്കണവാടികള്‍ക്ക് ജില്ല പഞ്ചായത്ത് വിഹിതമുള്‍പ്പടെ സംസ്ഥാന വിഹിതം ആവശ്യപ്പെട്ടും 14 അങ്കണവാടികള്‍ക്ക് സംസ്ഥാന വിഹിതം നല്‍കിയും കെട്ടിടം പണിയുന്നതിന് വനിത ശിശു വികസന വകുപ്പില്‍ നിര്‍ദേശം സമര്‍പ്പിച്ചിരിക്കുകയാണ്. ഇതിനു പുറമേ എട്ടു അങ്കണവാടികള്‍ക്ക് പഞ്ചായത്തുകള്‍ വഴി ദേശീയ തൊഴിലുറപ്പ് പദ്ധതിയില്‍ ഏറ്റെടുത്ത് കെട്ടിടനിര്‍മാണം നടത്തി വരുന്നതായും യോഗത്തില്‍ അറിയിച്ചു.യോഗത്തില്‍ ആലപ്പുഴ നഗരസഭാധ്യക്ഷന്‍ തോമസ് ജോസഫ്, എ.ഡി.എം. ഐ.അബ്ദുള്‍സലാം, പ്രൊജക്ട് ഡയറക്ടര്‍ കെ. ആര്‍.ദേവദാസ്, വിവിധ വകുപ്പുദ്യോഗസ്ഥര്‍, ജനപ്രതിനിധികള്‍ പങ്കെടുത്തു.