ന്യൂഡല്‍ഹി: രണ്ടുമാസത്തെ ലോക്ക് ഡൗണിനു ശേഷം രാജ്യത്ത് ആഭ്യന്തര വിമാനസര്‍വിസ് ഭാഗികമായി പുനസ്ഥാപിച്ചു. ഇന്നലെ പുലര്‍ച്ചെയോടെയാണ് വിമാനസര്‍വിസുകള്‍ പുനരാരംഭിച്ചത്.
എന്നാല്‍ മുന്നറയിപ്പില്ലാതെ നിരവധി സര്‍വിസുകള്‍ റദ്ദാക്കിയതിനെ തുടര്‍ന്ന് രാജ്യത്തെ വിമാനത്താവളങ്ങളില്‍ അനിശ്ചിതത്വം നിലനില്‍ക്കുകയാണ്. സര്‍വിസുകള്‍ റദ്ദാക്കിയതിനെ തുടര്‍ന്ന് ഡല്‍ഹി, മുംബൈ അടക്കം വിവിധ വിമാനത്താവളങ്ങളിലെത്തിയ നിരവധിയാത്രക്കാര്‍ വലഞ്ഞു. ഡല്‍ഹിയില്‍നിന്നും ഡല്‍ഹിയിലേയ്ക്കുമുള്ള 82 വിമാനങ്ങളാണ് റദ്ദാക്കിയത്. എന്നാല്‍ വിമാനങ്ങള്‍ റദ്ദാക്കുന്നത് സംബന്ധിച്ച് തങ്ങള്‍ക്ക് അവസാന നിമിഷംവരെ അറിയിപ്പുകളൊന്നും ലഭിച്ചില്ലെന്ന് ഇന്ദിരാഗാന്ധി വിമാനത്താവളത്തിലെ ടെര്‍മിനല്‍ മൂന്നില്‍ എത്തിയ യാത്രക്കാര്‍ പറഞ്ഞു.
വിമാനസര്‍വിസുകള്‍ നടത്താന്‍ തയ്യാറല്ലെന്ന് വിവിധ സംസ്ഥാനങ്ങള്‍ കേന്ദ്രസര്‍ക്കാരിനെ അറിയിച്ചതിനെ തുടര്‍ന്നാണ് റദ്ദാക്കേണ്ടിവന്നതെന്ന് വിമാനത്താവള അധികൃതരുടെ വിശദീകരണം. ഡല്‍ഹി വിമാനത്താവളത്തില്‍നിന്ന് 125 സര്‍വിസുകളും ഇവിടേയ്ക്ക് 118 സര്‍വീസുകളുമാണ് ഇന്ന് നടത്താന്‍ നിശ്ചയിച്ചിരുന്നത്.
മുംബൈ ഛത്രപതി ശിവജി അന്താരാഷ്ട്ര വിമാനത്താവളത്തിലും സമാനമായ സാഹചര്യമുണ്ടായി. ഇവിടെനിന്നുള്ള നിരവധി സര്‍വിസുകളും റദ്ദാക്കിയതായാണ് റിപ്പോര്‍ട്ട്.
തെര്‍മല്‍ സ്‌ക്രീനിങ് കൂടാതെ ഓരോ യാത്രക്കാരുടെയും മൊബൈല്‍ ഫോണുകളില്‍ ആരോഗ്യസേതു ആപ്പ് ഇന്‍സ്റ്റാര്‍ ചെയ്തിട്ടുണ്ടോ എന്ന പരിശോധനയും സുരക്ഷാ ജീവനക്കാര്‍ നടത്തുന്നുണ്ട്.
ചെന്നൈ, ബെംഗളൂരു, കൊല്‍ക്കത്ത, ഗുവാഹത്തി, ഇംഫാല്‍ തുടങ്ങിയ വിമാനത്താവളങ്ങളിലും സര്‍വിസുകള്‍ റദ്ദാക്കാപ്പെട്ടതിനെ തുടര്‍ന്ന് യാത്രക്കാര്‍ പ്രയാസത്തിലായി. ബംഗളൂരുവില്‍നിന്നുള്ള ഒമ്പത് സര്‍വിസുകളാണ് റദ്ദാക്കപ്പെട്ടത്. കൊല്‍ക്കത്ത വിമാനത്താവളത്തില്‍നിന്നുള്ള വിമാനസര്‍വിസുകള്‍ ആരംഭിക്കാത്തതിനെ തുടര്‍ന്നാണ് വടക്കുകിഴക്കന്‍ സംസ്ഥാനങ്ങളില്‍ സര്‍വിസുകള്‍ മുടങ്ങിയതെന്നാണ് എയര്‍പോര്‍ട്ട് അതോറിറ്റിയുടെ വിശദീകരണം.