ശ്രീനഗര്‍: രാഷ്ട്രീയ രംഗത്ത് ഇറങ്ങുന്നതിനായി സിവില്‍ സര്‍വിസില്‍നിന്ന് രാജിവച്ച് കശ്മിര്‍ സ്വദേശി ഷാ ഫസല്‍ പുതിയ രാഷ്ട്രീയ പാര്‍ട്ടി രൂപീകരിച്ചു. ഇന്നലെ ശ്രീനഗറില്‍നടന്ന പൊതുയോഗത്തിലാണ് അദ്ദേഹം ജമ്മുകശ്മിര്‍ പീപ്പിള്‍സ് മൂവ്‌മെന്റ്(ജെ.കെ.പി.എം) എന്ന രാഷ്ട്രീയ പാര്‍ട്ടി രൂപീകരിച്ചത്. മാറ്റത്തിന്റെ കാറ്റ് വീശുമെന്നാണ് പാര്‍ട്ടി രൂപീകരിച്ചുകൊണ്ട് അദ്ദേഹം പ്രഖ്യാപിച്ചത്. ജെ.എന്‍.യുവിലെ വിദ്യാര്‍ഥി നേതാവ് ഷെഹ്‌ല റാഷിദ് ഉള്‍പ്പെടെയുള്ള നിരവധി പേര്‍ പാര്‍ട്ടിയില്‍ അംഗത്വമെടുത്തിട്ടുണ്ട്. താന്‍ സിവില്‍ സര്‍വിസില്‍ പ്രവേശിച്ചെങ്കിലും തന്റെ നിയോഗം തെറ്റാണെന്ന് തിരിച്ചറിഞ്ഞാണ് രാഷ്ട്രീയത്തിലേക്ക് പ്രവേശിക്കുന്നതെന്ന് അദ്ദേഹം പാര്‍ട്ടി പ്രഖ്യാപന യോഗത്തില്‍ അറിയിച്ചു.