മലപ്പുറം: ശക്തമായ മഴക്കിടെ ജില്ലയിലെ ജലാശയങ്ങള്‍ കവര്‍ന്നത് 27 ജീവനുകള്‍. ഈ മാസം മാത്രം പത്ത് പേരാണ് ജില്ലയിലെ പുഴകളും തോടുകളും ഉള്‍പ്പടെയുള്ള വെള്ളക്കെട്ടുകളില്‍ മുങ്ങി ജീവന്‍വെടിഞ്ഞത്. കഴിഞ്ഞ ആറുമാസത്തിനിടെ മാത്രം 27 പേര്‍ വെള്ളത്തില്‍ മുങ്ങിമരിച്ചതായാണ് ക്രൈം റെക്കോര്‍ഡ്‌സ് ബ്യൂറോയുടെ കണക്കുകള്‍.
പുഴയില്‍ ഒഴുക്കില്‍ പെട്ട് 11 പേരാണ് മരണത്തിനിരയായത്. കിണറുകളില്‍ വീണ് മൂന്ന് പേരും മരിച്ചു. വര്‍ഷക്കാലമായതോടെയാണ് മരണനിരക്ക് ഉയര്‍ന്നു. കഴിഞ്ഞ ഞായറാഴ്ച പറപ്പൂര്‍ ആട്ടീരി തോട്ടില്‍ കാല്‍തെന്നി വീണ് മരിച്ച സന ഫാത്വിമയാണ് അവസാനമായി മരണപ്പെട്ടത്. അപ്രതീക്ഷിതമായാണ് മിക്ക അപകടങ്ങളും സംഭവിച്ചത്. പരിചയമുള്ള സ്ഥലത്ത് സ്ഥിരമായി വീട്ടുകാരോടൊപ്പം കുളിക്കാന്‍ പോകുന്ന കടവില്‍ തന്നെയാണ് സന ഫാത്വിമയെന്ന പത്ത് വയസുകാരിക്ക് ജീവന്‍ നഷ്ടമായത്. താത്കാലിക നടപ്പാലത്തിന് മുകളില്‍നിന്ന് കാല്‍തെറ്റി തോട്ടിലേക്ക് വീഴുകയായിരുന്നു.
രണ്ട് ദിവസം കഴിഞ്ഞാണ് മയ്യിത്ത് കണ്ടെത്തിയത്. നിലമ്പൂരില്‍ യുവാവ് പുഴയില്‍ വീണതും ബന്ധുവീട്ടിലേക്ക് വിരുന്നുവന്ന സഹോദരന്‍മാരായ രണ്ട് യുവാക്കള്‍ തിരൂരങ്ങാടി കടലുണ്ടി പുഴയില്‍ മുങ്ങി മരിച്ചതും കഴിഞ്ഞ മാസങ്ങളിലാണ്.
കൂടുതല്‍ ആഴങ്ങളുള്ള പുഴക്കടവുകളുടെയും മറ്റു ജാലാശങ്ങളുടെയും പരിസരങ്ങളില്‍ മുന്നറിയിപ്പ് ബോര്‍ഡുകള്‍ സ്ഥാപിക്കാത്തതും അപരിചിതരെ അപകടത്തിലേക്ക് നയിക്കുന്നുണ്ട്. ചുരുക്കം സ്ഥലങ്ങളില്‍ തദ്ദേശ സ്ഥാപനങ്ങള്‍ക്ക് കീഴില്‍ ബോര്‍ഡുകള്‍ സ്ഥാപിച്ചിട്ടുണ്ടെങ്കിലും മിക്കയിടങ്ങളിലും ഇത്തരം ബോര്‍ഡുകളില്ല. ശക്തമായ ഒഴുക്കുള്ള സമയത്ത് പരിചയമില്ലാത്തവര്‍ ആഴമുള്ള കവടവുകളില്‍ ഇറങ്ങുന്നത് അപകടത്തിന് വഴിയൊരുക്കുന്നു.