ഡെറാഡൂണ്‍: അന്താരാഷ്ട്ര ക്രിക്കറ്റില്‍ പിച്ചവച്ചു തുടങ്ങിയ അഫ്ഗാനിസ്താന്‍ ടെസ്റ്റ് ക്രിക്കറ്റില്‍ പുതുചരിത്രം രചിച്ചു. തങ്ങളുടെ രണ്ടാമത്തെ ടെസ്റ്റ് മത്സരത്തില്‍ത്തന്നെ ആദ്യ വിജയം സ്വന്തമാക്കിയ അഫ്ഗാന്‍ ടീം ഇംഗ്ലണ്ടിനും പാകിസ്താനും ഒപ്പം ഈ നേട്ടം സ്വന്തമാക്കുന്ന മൂന്നാമത്തെ ടീമായി മാറി.
അയര്‍ലന്‍ഡിനെതിരേ നേടിയ ഈ വിജയം അഫ്ഗാന്‍ ക്രിക്കറ്റിന് പുതുജീവന്‍ സമ്മാനിക്കുമെന്നതില്‍ സംശയമില്ല.

147 റണ്‍സ് വിജയലക്ഷ്യവുമായി ഇറങ്ങിയ അഫ്ഗാന്‍ റഹ്മത്ഷായുടെയും ഇഹ്‌സാനുല്ലയുടെയും അപരാജിത സെഞ്ചുറി കൂട്ടുകെട്ടിന്റെ മികവില്‍ മൂന്നു വിക്കറ്റ് നഷ്ടത്തില്‍ ലക്ഷ്യം മറികടന്നു. റഹ്മത് ഷാ 76 റണ്‍സോടെയും ഇഹ്‌സാനുല്ല 65 റണ്‍സോടെയും പുറത്താകാതെ നിന്നു. എന്നാല്‍ ഈ വിജയത്തിന് അഫ്ഗാനെ പ്രാപ്തരാക്കിയത് ബൗളിങ് നിരയുടെ മികച്ച പ്രകടനമാണ്.

അയര്‍ലന്‍ഡിന്റെ രണ്ടിന്നിങ്ങ്‌സിലും ബാറ്റ്‌സ്മാന്‍മാരെ ക്രീസില്‍ നിലയുറപ്പിക്കാന്‍ റാഷിദ് ഖാന്‍ നേതൃത്വം നല്‍കിയ അഫ്ഗാന്‍ ബൗളിങ്ങ് നിര സമ്മതിച്ചില്ല. രണ്ടാം ഇന്നിങ്‌സില്‍ അഞ്ചു വിക്കറ്റുകള്‍ പിഴുത ലെഗ് സ്പിന്നര്‍ റാഷിദ് ഖാന്‍ രണ്ടിന്നിങ്‌സിലുമായി ഏഴു വിക്കറ്റുകള്‍ നേടി. റാഷിദിനു കൂട്ടായി യാമിന്‍ അഹ്മദ്‌സായിയും ആറു വിക്കറ്റ് നേട്ടത്തോടെ മികച്ചു നിന്നപ്പോള്‍ അയര്‍ലന്‍ഡിന് മികച്ച സ്‌കോര്‍ കെട്ടിപ്പടുക്കാന്‍ സാധിച്ചില്ല.

അഫ്ഗാന്റെ ആദ്യ രാജ്യാന്തര ടെസ്റ്റ് ഇന്ത്യക്കെതിരേ ആയിരുന്നു. എന്നാല്‍ ആദ്യ മത്സരത്തില്‍ ഒരിന്നിങ്‌സിനും 262 റണ്‍സിനും അവര്‍ പരാജയപ്പെട്ടു. എന്നാല്‍ അയര്‍ലന്‍ഡിനെതിരെയുള്ള ഈ വിജയത്തോടുകൂടി ഇന്ത്യയെപോലും പിന്തള്ളി ചരിത്രത്തില്‍ ഇടം നേടിയിരിക്കുകയാണ് അഫ്ഗാനിസ്താന്‍ എന്ന ക്രിക്കറ്റിലെ കുഞ്ഞന്‍ ടീം. ആദ്യ ടെസ്റ്റ് വിജയത്തിനായി ഇന്ത്യക്ക് 25 മത്സരം വേണ്ടി വന്നപ്പോള്‍ അഫ്ഗാന്‍ ആ നേട്ടം തങ്ങളുടെ രണ്ടാം മത്സരത്തില്‍ തന്നെ നേടി. ക്രിക്കറ്റിലെ അടുത്ത കറുത്ത കുതിരകള്‍ തങ്ങളാണെന്ന സൂചനയും ഈ വിജയത്തോടെ അഫ്ഗാന്‍ നല്‍കുന്നുണ്ട്.