ചേലക്കര: വെടിക്കെട്ട് നടത്തുന്ന ഉത്സവ പള്ളി നേര്‍ച്ചകമ്മിറ്റികളോട് സര്‍ക്കാരിന് ചിറ്റമ്മനയമാണെന്ന് അന്തിമഹാകാളന്‍ കാവ് വേല കോഓര്‍ഡിനേഷന്‍ കമ്മിറ്റി യോഗം ആരോപിച്ചു.
വെടിക്കെട്ട് അനുമതിക്കായി മന്ത്രിമന്ദിരങ്ങള്‍ കയറിയിറങ്ങിയ ഉത്സവകമ്മിറ്റികളോട് കേന്ദ്രസര്‍ക്കാരിനെ പഴിപറഞ്ഞ് രക്ഷപ്പെടുകയും, വെടിക്കെട്ട് ഇല്ലാതാക്കുകയും ചെയ്തസര്‍ക്കാര്‍ തൃശ്ശൂര്‍ പൂരംവെടിക്കെട്ടിന് ഏത് നിയമമാണ് ഭേദഗതി ചെയ്തിട്ടുള്ളതെന്ന് വ്യക്തമാക്കണം.
വിശാലമായ കൊയ്‌തൊഴിഞ്ഞ പാടത്ത് മാനദണ്ഡങ്ങള്‍ക്കനുസൃതമായി പോലും വെടിക്കെട്ട് നടത്താന്‍ അനുവദിക്കാത്തവര്‍ പടുകൂറ്റന്‍ കെട്ടിടങ്ങള്‍ക്ക് മധ്യേയുള്ള സ്ഥലത്ത് അനുമതി നേടികൊടുക്കുന്നതില്‍നിന്ന് തന്നെ സര്‍ക്കാരിന്റെ ഇരട്ടത്താപ്പ് ജനം മനാിലാക്കിയെന്നും യോഗം ആരോപിച്ചു. സംസ്ഥാനത്ത് തൃശൂര്‍ പൂരം മാത്രം വെടിക്കെട്ട് ഉള്‍പ്പടെയുള്ള ആചാരപരമായ പതിവ് ചടങ്ങുകളോടെ നടത്തുകയും മറ്റുള്ളവയെ ഇല്ലാതാക്കാന്‍ ശ്രമിക്കുകയും ചെയ്യുന്നത് പ്രതിഷേധാര്‍ഹമാണ്.
വരും വര്‍ഷത്തെ വെടിക്കെട്ട് അനുമതിക്കായി ഇപ്പോള്‍തന്നെ പ്രവര്‍ത്തകരെ സജ്ജരാക്കി ശക്തമായ പ്രതിഷേധ സമരങ്ങള്‍ക്ക് തുടക്കം കുറിക്കുവാനും യോഗം തീരുമാനിച്ചു. വേല കോഓര്‍ഡിനേഷന്‍ കമ്മിറ്റി ചെയര്‍മാന്‍ രാജേഷ്‌നമ്പ്യാത്ത് അധ്യക്ഷനായി.
ഫെസ്റ്റിവല്‍ കോഓര്‍ഡിനേഷന്‍ കമ്മിറ്റി ജില്ലാ വൈസ്പ്രസിഡന്റ് പി.കെ സുനില്‍കുമാര്‍, കണ്‍വീനര്‍ കെ. സന്താനഗോപാലന്‍, സുബ്രഹ്മണ്യന്‍ വടക്കില്ലം, ചന്ദ്രന്‍മണ്ണം പറമ്പില്‍, രാജന്‍ നമ്പ്യാത്ത്, ജിതേഷ് വെങ്ങാനെല്ലൂര്‍, വിജയന്‍ ചാത്തനാത്ത്, ടി. കാര്‍ത്തികേയന്‍, സജിത്ത് മേനോന്‍ പ്രസംഗിച്ചു.