അരീക്കോട്: എളയൂര്‍ മല്‍ജഉല്‍ ഐതാം യതീംഖാന വാര്‍ഷികം 22, 23 തിയതികളില്‍ നടക്കും. ഇന്നലെ യതീംഖാനയില്‍ ചേര്‍ന്ന യോഗത്തില്‍ സമ്മേളന വിജയത്തിനായി 40 അംഗ സ്വാഗതസംഘം രൂപീകരിച്ചു. 22ന് വൈകിട്ട് നാലിന് തൃപ്പനച്ചി മുഹമ്മദ് മുസ്‌ലിയാര്‍, തവരാപറമ്പ് മൊയ്തീന്‍ കുട്ടി മുസ്‌ലിയാര്‍ എന്നിവരുടെ മഖാം സിയാറത്തോടെ സമ്മേളനത്തിന് തുടക്കമാകും. രാത്രി ഏഴിന് നടക്കുന്ന ഉദ്ഘാടന സംഗമത്തില്‍ സയ്യിദ് മാനു തങ്ങള്‍ വെള്ളൂര്‍, എന്‍.വി മുഹമ്മദ് ബാഖവി, ടി.കെ മൊയ്തീന്‍ കുട്ടി ദാരിമി, മുജീബ് ഫൈസി പുല്ലൂര്‍ എന്നിവര്‍ പങ്കെടുക്കും.
23ന് രാവിലെ ഒന്‍പത് മുതല്‍ അഞ്ചുവരെ നടക്കുന്ന  പ്രാര്‍ഥനാ സംഗമം, കുടുംബ സന്ദര്‍ശനം എന്നിവയില്‍ ഷാജഹാന്‍ റഹ്മാനി കബ്ലക്കാട്, മജീദ് ഫൈസി കിഴിശ്ശേരി, ടി.കെ മൊയ്തീന്‍ കുട്ടി ദാരിമി എന്നിവര്‍ പ്രാര്‍ഥനക്ക് നേതൃത്വം നല്‍കും.
രാത്രി ഏഴിന് സമാപന പൊതുസമ്മേളനവും മജ്‌ലിസുന്നൂര്‍ വാര്‍ഷികവും പാണക്കാട് സയ്യിദ് ഹൈദരലി ശിഹാബ് തങ്ങള്‍ ഉദ്ഘാടനം ചെയ്യും. അഷ്‌റഫ് അഷ്‌റഫി പന്താവൂര്‍, പി.എം.എസ്  തങ്ങള്‍ തുവ്വൂര്‍, ഇബ്‌റാഹിം വാഫി എന്നിവര്‍ പ്രഭാഷണം നടത്തും.