ദുബൈ: രാജ്യാന്തര യാത്രാവിലക്കില്‍ പൊറുതിമുട്ടിയ പ്രവാസികള്‍ക്കായി യു.എ.ഇ കെ.എം.സി.സി ഏര്‍പ്പെടുത്തിയ ചാര്‍ട്ടഡ് വിമാനങ്ങള്‍ വിവിധ എമിറേറ്റ്‌സുകളില്‍ നിന്ന് ഇന്ന് മുതല്‍ പറന്നുയരും.
ഇന്ന് ഷാര്‍ജ അഴീക്കോട് മണ്ഡലം കെ.എം.സി.സിയുടെയും നാളെ ദുബൈ മലപ്പുറം ജില്ലാ കെ.എം.സി.സി.യുടെയും വിമാനങ്ങളാണ് പറന്നുയരുക.
തുടര്‍ന്നുള്ള ദിവസങ്ങളില്‍ വിവിധ എമിറേറ്റുകളില്‍ നിന്നും വിമാന സര്‍വിസ് ലഭ്യമാക്കാനുള്ള ഒരുക്കങ്ങള്‍ പുരോഗമിക്കുന്നതായി നാഷനല്‍ കമ്മിറ്റി പ്രസിഡന്റ് ഡോ. പുത്തൂര്‍ റഹ്മാന്‍, ജന. സെക്രട്ടറി നിസാര്‍ തളങ്കര ചാര്‍ട്ടഡ് ഫ്‌ലൈറ്റ് കോഓര്‍ഡിനേറ്റര്‍ ഫൈസല്‍ അഴീക്കോട് എന്നിവര്‍ അറിയിച്ചു.
നാളെ പുറപ്പെടുന്ന വിമാനത്തില്‍ യാത്ര ചെയ്യുന്നതിനുള്ള ആദ്യ ടിക്കറ്റ് യു.എ.ഇ കെ.എം.സി.സിയുടെ രക്ഷാധികാരി എ.പി ശംസുദ്ദീന്‍ ബിന്‍ മുഹ്‌യിദ്ദീന്‍ വിതരണം ചെയ്തു.
ചടങ്ങില്‍ ഷാര്‍ജ കെ.എം.സി.സി ആക്ടിങ് പ്രസിഡന്റ് കബീര്‍ ചെന്നക്കര, ജനറല്‍ സെക്രട്ടറി ചാക്കിനത് ഖാദര്‍ സന്നിഹിതരായിരുന്നു.