കട്ടപ്പന: നെടുങ്കണ്ടം താലൂക്ക് ആശുപത്രിയിലെ ഫ്രീസറില്‍ സൂക്ഷിച്ചിരുന്ന മൃതദേഹം ചീഞ്ഞ് ദുര്‍ഗന്ധം വമിച്ചു. മൂന്ന് ദിവസത്തോളമാണ് ആശുപത്രിയിലെ മോര്‍ച്ചറിയില്‍ മൃതദേഹം സൂക്ഷിച്ചത്. ഫ്രീസര്‍ പ്രവര്‍ത്തനക്ഷമമല്ലാതായതാണ് പ്രശ്‌നമായത്.
നെടുങ്കണ്ടം ടൗണിലെ വ്യാപാരസ്ഥാപനത്തിനു സമീപം ചൊവ്വായഴ്ച മരിച്ചനിലയില്‍ കണ്ടെത്തിയ വയോധികന്റെ മൃതദേഹമാണ് മോര്‍ച്ചറിയിലെ തകരാറിലായ ഫ്രീസറില്‍ സൂക്ഷിച്ചത്. വയോധികന്റെ ബന്ധുക്കളെകുറിച്ച് കൂടുതല്‍ വിവരങ്ങള്‍ ലഭ്യമല്ലാത്തതിനാല്‍ ഇന്‍ക്വസ്റ്റ് തയാറാക്കി മൃതദേഹം നെടുങ്കണ്ടം താലൂക്ക് ആശുപത്രി മോര്‍ച്ചറിയിലേക്കു മാറ്റുകയായിരുന്നു.
മരണം സംഭവിച്ച് ദിവസങ്ങള്‍ കഴിഞ്ഞിട്ടും ബന്ധുക്കളോ സുഹൃത്തുകളോ എത്താതിരുന്നതോടെ പോസ്റ്റുമാര്‍ട്ടം നടത്തി മൃതദേഹം പൊതുശ്മശാനത്തില്‍ മറവുചെയ്യുന്നതിന് നടപടികള്‍ ആരംഭിക്കുകയായിരുന്നു. ഇതിനിടെയാണ് മോര്‍ച്ചറിയില്‍ നിന്നും ദുര്‍ഗന്ധം വമിച്ചത്.
ആശുപത്രിയിലെത്തിയ രോഗികള്‍ ചികിത്സ ലഭ്യമാകുന്നതിനായി മൂക്കുപൊത്തി നില്‍ക്കേണ്ട അവസ്ഥയായിരുന്നു. സ്ഥലത്ത് നില്‍ക്കാന്‍ സാധിക്കാത്ത വിധം ദുര്‍ഗന്ധം വമിച്ചതോടെ ചികിത്സയ്ക്കായി എത്തിയ പലരും ഡോക്ടറെ കാണാതെ മടങ്ങി. പോസ്റ്റുമാര്‍ട്ടം നടപടികള്‍ പൂര്‍ത്തിയാക്കി മൃതദേഹം കൊണ്ടുപോയിട്ടും മണിക്കൂറുകളോളം സ്ഥലത്ത് ദുര്‍ഗന്ധം നിലനിന്നു.