മഞ്ചേരി: വിനോദയാത്രക്കിടെ കോയമ്പത്തൂരില്‍ നിന്നും ബൈക്ക് മോഷ്ടിച്ച സംഭവത്തില്‍  രണ്ടു യുവാക്കള്‍  മഞ്ചേരിയില്‍ പിടിയില്‍. പ്രതികളായ വാഴക്കാട് പേരെടുത്ത മീത്തല്‍ ആഷിഖ് (22), കോഴിക്കോട് മുക്കം നമ്പിപ്പറമ്പില്‍ ഫാരിസ് (23)   എന്നിവരെ എക്‌സൈസ് സര്‍ക്കിള്‍ ഇന്‍സ്‌പെക്ടര്‍ വേലായുധന്‍ കുന്നത്തും സംഘവുമാണു പിടികൂടിയത്. കോയമ്പത്തൂരിലേക്കു വിനോദ യാത്ര പോയതായിരുന്നു ഇരുവരും.  കൈവശമുണ്ടായിരുന്ന പണം തീര്‍ന്നപ്പോഴാണു റോഡരികില്‍ നിര്‍ത്തിയിട്ട ബൈക്കുമായി നാട്ടിലേക്കു മടങ്ങിയത്.
മഞ്ചേരി വായ്പാറപ്പടിയില്‍ വാഹന പരിശോധന നടത്തുകയായിരുന്ന എക്‌സൈസ് സംഘം ബൈക്ക് പിടിക്കുകയായിരുന്നു. യുവാക്കളുടെ പെരുമാറ്റത്തിലെ അസ്വാഭാവികത ശ്രദ്ധിക്കുകയും ചോദ്യം ചെയ്യുകയുമായിരുന്നു. തുടര്‍ന്നു നടത്തിയ പരിശോധനയില്‍ ബൈക്ക് കോയമ്പത്തൂര്‍ സ്വദേശിയുടേതാണു തെളിഞ്ഞു. ഇവര്‍ വേറെയും നിരവധി കേസുകളില്‍  പ്രതികളാണെന്നു കണ്ടത്തിയതിന്റെ അടിസ്ഥാനത്തില്‍  കൂടുതല്‍ അന്വേഷണത്തിനായി  പ്രതികളെയും ബൈക്കും മഞ്ചേരി പൊലിസിന് കൈമാറി.