മാഡ്രിഡ്: ചാംപ്യന്‍സ് ലീഗില്‍ ബയേണ്‍ മ്യൂണിക്കിനെ 2-1ന് തകര്‍ത്തതിന്റെ ആത്മവിശ്വാസത്തില്‍ ഇറങ്ങിയ റയല്‍ മാഡ്രിഡ് സ്പാനിഷ് ലാ ലിഗയില്‍ വിജയം പൊരുതി നേടി. 

സ്‌പോര്‍ടിങ് ഗിജോണിനെതിരേ 3-2നാണ് റയല്‍ എവേ മത്സരം വിജയിച്ചത്. അവസാന നിമിഷം വരെ 2-2ന് സമനിലയില്‍ നിന്ന മത്സരത്തില്‍ ഇസ്‌ക്കോ 90ാം മിനുട്ടില്‍ നേടിയ ഗോളാണ് റയലിനെ രക്ഷപ്പെടുത്തിയത്.
മത്സരത്തില്‍ ഇസ്‌ക്കോ ഇരട്ട ഗോളുകള്‍ നേടി. ശേഷിച്ച ഗോള്‍ ആല്‍വരോ മൊററ്റ സ്വന്തമാക്കി. ജയത്തോടെ ഒന്നാം സ്ഥാനത്തുള്ള റയലിന് 75 പോയിന്റുകള്‍. മറ്റു മത്സരങ്ങളില്‍ അത്‌ലറ്റിക്ക് ബില്‍ബാവോ 5-1ന് ലാസ് പല്‍മാസിനേയും ഡിപോര്‍ടീവോ ലാ കൊരുണ 2-0ത്തിന് മലാഗയേയും തകര്‍ത്തു.

ടോട്ടനം മുന്നോട്ട്

ലണ്ടന്‍: ഇംഗ്ലീഷ് പ്രീമിയര്‍ ലീഗില്‍ ടോട്ടനം ഹോട്‌സ്പര്‍ വിജയം തുടരുന്നു. ബേണ്‍മൗത്തിനെ 4-0ത്തിന് കീഴടക്കി അവര്‍ രണ്ടാം സ്ഥാനം നിലനിര്‍ത്തി. ജയത്തോടെ ടോട്ടനത്തിന് 71 പോയിന്റുകള്‍. കിരീടത്തിനായി ചെല്‍സിയുമായുള്ള പോയിന്റ് വ്യത്യാസം നാലാക്കി കുറക്കാനും ടോട്ടനത്തിനായി.
മറ്റു മത്സരങ്ങളില്‍ എവര്‍ട്ടന്‍ 3-1ന് ബേണ്‍ലിയേയും സ്റ്റോക് സിറ്റി ഇതേ സ്‌കോറിന് ഹള്‍ സിറ്റിയേയും വാട്‌ഫോര്‍ഡ് 1-0ത്തിന് സ്വാന്‍സീ സിറ്റിയേയും പരാജയപ്പെടുത്തി. ലെയ്സ്റ്റര്‍ സിറ്റി- ക്രിസ്റ്റല്‍ പാലസ്, സണ്ടര്‍ലാന്‍ഡ്- വെസ്റ്റ് ഹാം പോരാട്ടങ്ങള്‍ 2-2ന് സമനില.

ലെയ്പ്‌സിഗിനും ബൊറൂസിയക്കും ജയം

മ്യൂണിക്ക്: ജര്‍മന്‍ ബുണ്ടസ് ലീഗയില്‍ ബൊറൂസിയ ഡോര്‍ട്മുണ്ട്, ലെയ്പ്‌സിഗ്, വോള്‍വ്‌സ്ബര്‍ഗ്, ഹോഫെന്‍ഹെയിം ടീമുകള്‍ക്ക് വിജയം. ബൊറൂസിയ 3-1ന് ഫ്രാങ്ക്ഫര്‍ടിനേയും ലെയ്പ്‌സിഗ് 4-0ത്തിന് ഫ്രീബര്‍ഗിനേയും ഹോഫെന്‍ഹെയിം 5-3ന് മോണ്‍ചെന്‍ഗ്ലെഡ്ബാചിനേയും വോള്‍വ്‌സ്ബര്‍ഗ് 3-0ത്തിന് ഇംഗോള്‍സ്റ്റഡിനേയും കീഴടക്കി. മെയ്ന്‍സ്- ഹെര്‍ത്ത പോരില്‍ മെയ്ന്‍സിന് 1-0ത്തിന്റെ ജയം.

സമനില വിടാതെ മിലാന്‍ നാട്ടങ്കം

മിലാന്‍: ഇറ്റാലിയന്‍ സീരി എയില്‍ ഇന്റര്‍ മിലാന്‍- എ.സി മിലാന്‍ നാട്ടങ്കം 2-2ന് സമനില. ഇന്റര്‍ മിലാന്റെ തട്ടകത്തില്‍ നടന്ന നാട്ടങ്കമാണ് സമനിലയില്‍ കശാശിച്ചത്. നേരത്തെ എ.സി മിലാന്റെ തട്ടകത്തിലെ നാട്ടങ്കവും ഇതേ സ്‌കോറില്‍ അവസാനിച്ചിരുന്നു.
മറ്റു മത്സരങ്ങളില്‍ ഒന്നാം സ്ഥാനത്ത് കുതിക്കുന്ന യുവന്റസ് 2-0ത്തിന് പെസ്‌ക്കാരയെ വീഴ്ത്തി. ലാസിയോ- ജെനോവ പോരാട്ടം 2-2ന് സമനില. റോമ- അറ്റ്‌ലാന്റ മത്സരവും 1-1ന് സമനില.

പി.എസ്.ജിക്ക് ജയം

പാരിസ്: ഫ്രഞ്ച് ലീഗ് വണില്‍ പാരിസ് സെന്റ് ജെര്‍മെയ്‌ന് വിജയം. മറുപടിയില്ലാത്ത രണ്ടു ഗോളുകള്‍ക്ക് അവര്‍ ആന്‍ജേഴ്‌സിനെ കീഴടക്കി.