ജിദ്ദ: അളവില്‍ കൂടുതല്‍ മരുന്ന് കൊണ്ടുവന്ന കേസിനെ തുടര്‍ന്ന് 11 മാസത്തെ യാത്രാവിലക്കിനൊടുവില്‍ മലയാളി യുവാവ് നാട്ടിലേക്ക് മടങ്ങി. സഊദിയിലെ സ്വകാര്യ കരാര്‍ കമ്പനിയിലെ ജീവനക്കാരനായിരുന്ന കൊച്ചി സ്വദേശി നിഷീഫ് ഒലിയത്ത് അബ്ദുല്‍ ഗഫൂറാണ് മാസങ്ങള്‍ നീണ്ട യാത്രാനിരോധനത്തിനൊടുവില്‍ സാമ്പത്തിക പിഴയൊടുക്കി എക്‌സിറ്റ് വിസയില്‍ നാട്ടിലേക്ക് മടങ്ങിയത്.
2016 ജൂണ്‍ 18നായിരുന്നു കേസിനാസ്പദമായ സംഭവം. ശാരീരികാസ്വാസ്ഥ്യത്തെ തുടര്‍ന്ന് വിദഗ്ധ ചികിത്സക്ക് രണ്ടാഴ്ച അവധിക്ക് നാട്ടില്‍ പോയ നിഷീഫ് തിരികെ വരുമ്പോള്‍ ഒരു വര്‍ഷത്തേക്ക് ഉപയോഗിക്കാനുള്ള മരുന്നും കൈയില്‍ കരുതിയിരുന്നു. ശ്രീലങ്കന്‍ എയര്‍ലൈന്‍സ് വിമാനത്തില്‍ റിയാദ് വിമാനത്താവളത്തിലിറങ്ങിയ നിഷീഫിനെ കസ്റ്റംസ് തടഞ്ഞു. തുടര്‍ന്ന് നടത്തിയ പരിശോധനയില്‍ ലഗേജില്‍ അമിതമായ അളവില്‍ ഗുളികയും മറ്റ് മരുന്നുകളും കണ്ടതാണ് വിനയായത്. നാട്ടില്‍ ചികിത്സിച്ച ഡോക്ടര്‍ നിര്‍ദേശിച്ച ഒരു വര്‍ഷത്തേക്കുള്ള മരുന്നായിരുന്നു അത്. ഡോക്ടറുടെ കുറിപ്പ് ഉള്‍പ്പെടെ മതിയായ രേഖകളുണ്ടായിരുന്നെങ്കിലും അതൊന്നും രക്ഷയായില്ല. 11 ദിവസത്തോളം ജയിലില്‍ കിടക്കേണ്ടിവന്നു. ഇയാളുടെ ബന്ധുവായ റിയാദ് ആഷിഖ് വലപ്പാട് വിഷയത്തിലിടപെടുകയും മരുന്നുകളെയും ചികിത്സയെയും കുറിച്ച് പൊലിസ് ആവശ്യപ്പെട്ട മുഴുവന്‍ രേഖകളും ഹാജരാക്കുകയും ചെയ്തതിനെ തുടര്‍ന്ന് സഊദി പൗരന്റെ ജാമ്യത്തില്‍ നിഷീഫിനെ ജയിലില്‍ നിന്ന് വിട്ടയച്ചു.
കഴിഞ്ഞ മാസമാണ് കേസില്‍ തീര്‍പ്പുണ്ടായത്. സാമ്പത്തിക പിഴയും നാടുകടത്തലുമായിരുന്നു വിധി. ഇഖാമ പുതുക്കാനും ബാങ്ക് അക്കൗണ്ടില്‍ നിന്ന് പണം തിരിച്ചെടുക്കാനും കഴിഞ്ഞു. വിമാനത്താവളത്തിലെ കസ്റ്റംസ് വിഭാഗത്തില്‍ പിഴ അടച്ചതോടെയാണ് യാത്രാവിലക്ക് നീങ്ങിയത്. തുടര്‍ന്നാണ് നാട്ടിലേക്ക് മടങ്ങാന്‍ വഴി തുറന്നത്.